Стрыжак і Лявончык прыгавораныя да 18 гадоў пазбаўлення волі па справе “арганізатараў BySol”
25 жніўня, Позірк. Гомельскі абласны суд вынес завочныя прыгаворы па справе “арганізатараў фонду салідарнасці BySol”, паведамляе дзяржвыданне “Гомельская праўда”.
Сузаснавальнік і кіраўнік фонду салідарнасці BySol Андрэй Стрыжак прыгавораны ў рамках спецвытворчасці да 18 гадоў пазбаўлення волі са штрафам у памеры 6.000 базавых велічынь (252 тыс. рублёў). Такое ж пакаранне прызначанае яго паплечніку, кіраўніку фонду салідарнасці By_Help Аляксею Лявончыку.
Іншым фігурантам справы — ІТ-прадпрымальніку, аднаму са стваральнікаў лічбавай платформы “Новая Беларусь” Яраславу Ліхачэўскаму, аднаму з заснавальнікаў BySol Аляксею Кузьмянкову, ІТ-прадпрымальніку, таксама звязанаму з BySol, Аляксандру Падгорнаму, кіраўніку Беларускага моладзевага хаба (Варшава) Аляксандру Лапко і актывістцы, былой сяброўцы палітвязня Эдуарда Бабарыкі, блогеру Аляксандры Жук (Зверавай) — вынесеныя аднолькавыя прыгаворы: 16 гадоў зняволення і штраф у памеры 5.500 б.у. (231 тыс.).
Аб перадачы справы ў суд паведаміла 17 лютага Генеральная пракуратура. Фігуранты абвінавачваліся паводле пяці артыкулаў Крымінальнага кодэкса: 130 (распальванне расавай, нацыянальнай, рэлігійнай або іншай сацыяльнай варожасці альбо варажнечы), 2891 (прапаганда тэрарызму), 3611 (стварэнне экстрэмісцкага фарміравання або ўдзел у ім), 3613 (удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу) і 368 (абраза прэзідэнта).
Сцвярджалася, што “абвінавачваныя не пазней за студзень 2020 года папярэдне аб’ядналіся ў злачынную супольнасць — экстрэмісцкае фарміраванне “By_help”: “Таксама ў яго склад увайшлі такія структурныя падраздзяленні, як “Media Solidarity Belarus” і “Беларусам.pl”.
Затым у жніўні 2020 года “для пашырэння супрацьпраўнай дзейнасці яны аб’ядналіся з іншымі абвінавачанымі ў экстрэмісцкае фарміраванне “Фонд салідарнасці BYSOL / Belarus solidarity foundation”, а ў далейшым “стварылі структурныя падраздзяленні “Voices from Belarus” і “Digital Solidarity”,
Дзейнасць згаданых арганізацый, паводле сцвярджэння пракуратуры, была накіраваная на “дэстабілізацыю грамадскага парадку, стварэнне пагроз грамадскай бяспецы, правакуючы ўскладненне крымінагеннай абстаноўкі ў краіне, арганізацыю групавых дзеянняў, якія груба парушаюць грамадскі парадак і спалучаных з відавочным непадпарадкаваннем законным патрабаванням прадстаўнікоў улады, якія пацягнулі парушэнне працы транспарту, прадпрыемстваў, устаноў і арганізацый”.
Працэдура спецвытворчасці ў Беларусі прымянялася ў дачыненні да 152 чалавек. Гэтая вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.
Улады актыўна выкарыстоўваюць спецвытворчасць для абвінавачання, правядзення судоў і канфіскацыі па іх вырашэнні ўласнасці падсудных, якія знаходзяцца ў вымушанай эміграцыі.
Стрыжак адхілены ад працы ў BySol (дапоўнена)
23 ліпеня, Позірк. Андрэй Стрыжак адхілены ад “кіруючай пасады” і “выканання прадстаўніцкіх функцый” у фондзе салідарнасці BySol, паведаміла арганізацыя 23 ліпеня. Адзначаецца, што адхіленне будзе дзейнічаць у “перыяд правядзення разбіральніцтва”, звязанага з абвінавачваннем Стрыжака ў харасменце. Па выніках "будзе прынятае …
