На фоне недахопу ўрачоў у Мінску будзе створана тры “флагманскія медцэнтры” па наданні экстраннай дапамогі

21 жніўня, Позірк. Сталічныя ўлады прынялі рашэнне аб стварэнні трох “флагманскіх медцэнтраў па наданні экстранай медыцынскай дапамогі”, заявіў старшыня Мінгарвыканкама Уладзімір Кухараў 21 жніўня.

На сустрэчы з супрацоўнікамі Бальніцы хуткай медыцынскай дапамогі чыноўнік адзначыў, што цэнтры будуць адкрытыя на базе БХМД, Навукова-практычнага цэнтра хірургіі, транспланталогіі і гематалогіі і 10-й гарадской клінічнай бальніцы, паведамляе прэс-служба Мінгарвыканкама.

Паводле яго слоў, тэрытарыяльнае пераразмеркаванне надання экстранай медыцынскай дапамогі на тры стацыянары неабходна для “зніжэння каласальнай нагрузкі на БХМД”.

Кухараў падкрэсліў, што ў БХМД пастаянна “абнаўляецца дыягнастычнае і лячэбнае абсталяванне”, “праводзіцца паэтапны рамонт карпусоў і аддзяленняў”.

Як лічыць чыноўнік, медустановы сталіцы надаюць дапамогу грамадзянам “на высокім узроўні”.

Разам з тым, паводле даных дзяржаўнай службы занятасці на 21 жніўня, медустановам сталіцы не хапае 1.075 лекараў-спецыялістаў.