20 жніўня, Позірк. Запаволенне інфляцыі ў ліпені звязана з “прыкметным паслабленнем росту цэн на прадукты харчавання”, гаворыцца ў экспрэс-аналізе даследчага цэнтра BEROC.
Адзначаецца, што інфляцыя ў сегменце плодаагародніннай прадукцыі склалася паблізу нуля пасля падаражэння прыкладна на 70–75% (тут і далей месяц да месяца) у сярэднім у траўні — чэрвені.
“Такая дынаміка звязаная з больш познім паступленнем новага ўраджаю гародніны на рынкі з-за кліматычных асаблівасцяў бягучага года, — сцвярджаюць эксперты. — У выніку зніжэння росту цэн на плодаагароднінную прадукцыю небазавая інфляцыя запаволілася з прыкладна 11,3% у чэрвені да 5,5% у ліпені”.
Акрамя гародніны, на паслабленне цэнавай дынамікі прадуктаў харчавання істотна паўплывала запаволенне росту кошту мяса, малака і прадуктаў з іх. Менавіта на гэтыя тавары, звяртае ўвагу BEROC, цэнавы кантроль быў зноў пастрожаны ў канцы чэрвеня, у выніку базавая інфляцыя запаволілася з прыкладна 9% у чэрвені да 7% у ліпені.
“Акрамя таго, блізкім да 1% захоўваўся рост цэн на нехарчовыя тавары. Яго абмяжоўвала назапашанае з пачатку года ўмацаванне беларускага рубля да долара і юаня, а таксама па-ранейшаму строгае дзяржрэгуляванне ў гэтым сегменце спажывецкага кошыка. Рост цэн на нерэгулюемыя паслугі падняўся да 10% у ліпені, а з выключэннем валацільных міжнародных чыгуначных і авіяперавозак ацэньваецца каля 7,5%”, — гаворыцца ў аглядзе.
Разам з тым па-ранейшаму высокімі — больш за 10% — захоўваліся тэмпы падаражэння рынкавых бытавых паслуг (“найбольш цяжкая пазіцыя нерэгулюемых паслуг”).
“Устойліва высокая інфляцыя ў рынкавых паслугах звязана з істотным цэнавых ціскам перагрэтых ўнутранага попыту і рынку працы. Назапашаны разрыў ва ўзроўнях цэн на нерэгулюемыя паслугі і нехарчовыя тавары амаль дасягнуў 11% у ліпені”, — адзначаюць эксперты.
Эканамісты прагназуюць, што ў жніўні гадавая інфляцыя чакаецца паблізу 7,5%, а ўвосень, калі цэнавы кантроль не будзе істотна больш жорсткім, можа “ўвайсці ў дыяпазон 8–9%”.
Як паведамляў “Позірк”, спажывецкія цэны ў ліпені 2025 года выраслі на 0,2% у параўнанні з чэрвенем, на 5,6% — да снежня 2024 года, на 7,4% — да ліпеня 2024-га.
Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш чым на 0,7% (фактычна +0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — 3,3% (+5,4%), студзеня — ліпеня — 3,4% (+5,6%).
Далей: студзень — жнівень — 3,4%, студзень — верасень — 3,7%, студзень — кастрычнік — 4,1%, студзень — лістапад — 4,4%, год — 5% (гэты паказчык зацверджаны Аляксандрам Лукашэнкам).
