Фінляндыя мае намер унесці 50 тыс. еўра ў Міжнародны гуманітарны фонд падтрымкі палітвязняў у Беларусі і іх сем’яў

1 жніўня, Позірк. Фінляндыя мае намер выдзеліць 50 тыс. еўра для Міжнароднага гуманітарнага фонду падтрымкі палітвязняў у Беларусі і іх сем’яў, паведаміў “Позірку“ галоўны дарадца дэмакратычнага лідара Святланы Ціханоўскай Франак Вячорка.

Паводле яго слоў, у Хельсінкі адбылася сустрэча Ціханоўскай з Элінай Валтонен — міністра замежных спраў Фінляндыі, якая цяпер старшынюе ў Арганізацыі па бяспецы і супрацоўніцтве ў Еўропе (АБСЕ).

Бакі, адзначыў Вячорка, абмеркавалі “цэлы спектр пытанняў”, сярод якіх “удзел Беларусі ў міністэрскіх сустрэчах”, “мерапрыемствах АБСЕ па чалавечым вымярэнні”, імплементацыя Маскоўскага і Венскага механізмаў.

Беларускі палітык, паводле слоў яе дарадцы, падкрэсліла “важнасць выканання рэкамендацый АБСЕ — у тым ліку вызвалення і рэабілітацыі палітвязняў, прыцягнення вінаватых да адказнасці, правядзення выбарчай рэформы і новых выбараў пад міжнародным назіраннем”.

На думку Ціханоўскай, захаванне прынцыпаў АБСЕ і сістэмныя рэформы — гэта “неабходная ўмова для вываду Беларусі з ізаляцыі і заканчэння палітычнага крызісу”.

Бакі абмеркавалі сітуацыю з беларусамі ў Фінляндыі, якія сутыкаюцца з праблемамі пры звароце па дазвол на жыхарства, “асабліва калі іх пашпарты пратэрмінаваныя”. Паводле слоў Вячоркі, “дасягнутая дамоўленасць пра пошук законнага рашэння”, якое “дазволіць беларусам атрымаць дакументы без неабходнасці вяртання ў Беларусь”, паколькі такія візіты “пагражаюць рэпрэсіямі”.

Ціханоўская і Валтонен, паводле слоў дарадцы дэмлідара, закранулі тэму “новага пакета санкцый ЕС за парушэнні правоў чалавека”, падтрымкі “беларускай грамадзянскай супольнасці і медыя з дапамогай новага міжнароднага фонду, запушчанага Фінляндыяй з нагоды 50-годдзя АБСЕ”.

Беларускі палітык заклікала Хельсінкі далучыцца да ініцыятывы Вільнюса, які раней звярнуўся ў Міжнародны крымінальны суд у Гаазе наконт “трансгранічных злачынстваў супраць чалавечнасці, здзейсненых Лукашэнкам і яго паплечнікамі ў дачыненні да беларусаў”, а таксама ў Міжнародны суд ААН — праз “парушэнне Беларуссю сваіх абавязацельстваў у рамках Пратакола супраць 15 лістапада 2000 года”.

Раней да Міжнароднага гуманітарнага фонду падтрымкі палітвязняў у Беларусі і іх сем’яў далучыліся Нарвегія, Швецыя, Данія, Ісландыя, Латвія, Эстонія, Люксембург ды Іспанія.

Сродкі з фонду ідуць непасрэдна на праграмы рэабілітацыі, лячэння і рэлакацыі для былых палітвязняў і іх сем’яў, а не на адміністрацыйныя выдаткі.

Кіруюць сродкамі беларускія праваабарончыя арганізацыі.

Трохдзённы візіт Ціханоўскай у Фінляндыю, арганізаваны з ініцыятывы прэзідэнта і кіраўніцы МЗС гэтай краіны, распачаўся 30 ліпеня. 31 ліпеня ў фінскай сталіцы прайшла маштабная канферэнцыя АБСЕ Helsinki+50.

Выступаючы на палях мерапрыемства, Ціханоўская сярод іншага заявіла, што ў Беларусі працягваюцца рэпрэсіі, людзі паміраюць у турмах, колькасць палітвязняў павялічваецца, а пасля вызвалення яны “не атрымліваюць сапраўдную свабоду”.

Пераследы ўладамі непажаданых сталі транснацыянальным, падкрэсліла палітык. Актывістам за мяжой адмаўляюць у выдачы пашпартоў ды іншых дакументаў, ім пагражаюць смерцю, шантажуюць іх сем’і, прызнаюць “экстрэмістамі” і “тэрарыстамі”.