31 ліпеня, Позірк. Святлана Ціханоўская ўвечары 30 ліпеня пачала трохдзённы візіт у Фінляндыю, дзе пройдзе канферэнцыя АБСЕ Helsinki+50, паведаміў “Позірку“ галоўны дарадца беларускага дэмакратычнага лідара Франак Вячорка.
Паводле яго слоў, візіт арганізаваны па ініцыятыве прэзідэнта і міністра замежных спраў Фінляндыі. Раніцай 31 ліпеня Ціханоўская выступіць на дыскусіі “Пераслед праваабаронцаў у Беларусі“, якую арганізуюць фінскі і нідэрландскі хельсінкскія камітэты.
“Гэтае мерапрыемства прысвечана пераследу праваабаронцаў у Беларусі і накіравана на абмен поглядамі па пытаннях дэмакратыі і міжнароднай салідарнасці. У адзначэнне 50-годдзя Хельсінкскіх пагадненняў яно заклікае да тэрміновых дзеянняў у падтрымку беларускай грамадзянскай супольнасці, якая пакутуе ад рэпрэсій, і да аднаўлення міжнароднай адказнасці“, — гаворыцца ў анонсе сустрэчы.
Затым Ціханоўская дасць інтэрв’ю Чэшскаму радыё і адправіцца на адкрыццё канферэнцыі АБСЕ, дзе выступяць прэзідэнты Фінляндыі Аляксандр Стуб, Украіны Уладзімір Зяленскі, генеральны сакратар ААН Антоніу Гутэрыш і інш.
У праграме візіту таксама перамовы са Стубам, міністрамі замежных спраў Славеніі Таняй Фаён і Фінляндыі Элінай Валтанен, былым кіраўніком МЗС Фінляндыі, дэпутатам парламента Пека Хаавіста, спікерам парламента краіны Юсі Хала-ахо, сустрэча з дыяспарай, інтэрв’ю Шведскаму радыё, інфармацыйнаму агенцтву Kyodo News, сказаў Вячорка.
Як паведамляў “Позірк“ са спасылкай на фінскія СМІ, на канферэнцыі Helsinki+50 чакаецца прысутнасць прадстаўнікоў уладаў Беларусі і Расіі (тры і два дыпламаты адпаведна). Беларускі МЗС удзел у мерапрыемстве не анансаваў. Спікер расійскага знешнепалітычнага ведамства Марыя Захарава пацвердзіла інфармацыю, падкрэсліўшы пры гэтым, што РФ “не бачыць мэтазгоднасці ўдзелу ў мерапрыемстве на высокім палітычным узроўні“.
Канферэнцыя Helsinki+50 прымеркаваная да 50-годдзя падпісання 1 жніўня 1975 года Хельсінкскіх пагадненняў, якія пасля сталі падмуркам для стварэння АБСЕ. Чакаецца, што ў ёй возьмуць удзел больш за тысячу чалавек з 57 дзяржаў — удзельніц АБСЕ і 11 краін-партнёраў.
