Першую чаргу рэканструкцыі Мінскай ачышчальнай станцыі завершаць напачатку 2026 года

29 ліпеня, Позірк. Першую чаргу рэканструкцыі Мінскай ачышчальнай станцыі завершаць напачатку 2026 года, паведамляе прэс-служба Мінскага гарвыканкама.

Агулам будзе пяць чэргаў: першая — рэканструкцыя збудаванняў механічнай ачысткі, другая — біялагічнай ачысткі, трэцяя — збудаванняў па падрыхтоўцы асадку сцёкавых вод, чацвёртая і пятая — будаўніцтва комплексаў па закісанні, сушцы і спальванні асадкаў сцёкавых вод.

Па словах дырэктара УП “Мінскводаканал” Фёдара Рымашэўскага, у актыўнай фазе знаходзяцца дзве чэргі з пяці, на якіх працуюць 250 чалавек. Яшчэ па трох завяршаецца праектаванне.

Завяршыць усе працы па рэканструкцыі МАС плануецца ў 2028 годзе, гаворыцца ў рэлізе.

Ачышчальныя збудаванні каналізацыі Мінска абслугоўваюць усю сталіцу, а таксама прылеглыя населеныя пункты Мінскага раёна — Ратамку, Бараўляны, Ждановічы, Калодзішчы, Гатава, Міханавічы і шэраг іншых.

Паводле даных “Мінскводаканала”, агульны аб’ём сцёкавых вод, які штодзённа паступае на станцыю для ачысткі, складае каля 450 тыс. куб. м вады. З іх 350 тыс. куб. м прымае першая Мінская ачышчальная станцыя, пабудаваная ў 1963 годзе.

Мадэрнізацыі беларускай сістэмы водазабеспячэння і водаадвядзення да ўвядзення санкцый супраць беларускіх уладаў актыўна садзейнічалі Сусветны банк, Еўрапейскі банк рэканструкцыі і развіцця, Еўрапейскі інвестыцыйны банк. У прыватнасці, ЕБРР і ЕІБ у 2018 годзе ўхвалілі праект рэканструкцыі Мінскай ачышчальнай станцыі на 168 млн еўра.

У сакавіку 2023 года кіраўніцтва “Белвадаканала” заяўляла, што разлічвае будаваць аб’екты без заходніх крэдытаў.

У другой палове 2020 года, пасля прэзідэнцкіх выбараў і пачатку рэпрэсій, Сусветны банк прыпыніў супрацоўніцтва з Беларуссю ў выглядзе прадастаўлення новых крэдытаў або інвестыцый. 2 сакавіка 2022 года група СБ заявіла аб прыпыненні фінансавання ўсіх сумесных з Беларуссю і Расіяй праграм у сувязі з ваенным уварваннем ва Украіну.

Супрацоўніцтва ЕС з Мінскам у выглядзе міжнароднай тэхнічнай дапамогі было прыпынена амаль па ўсіх кірунках у сувязі з рэпрэсіямі пасля прэзідэнцкіх выбараў 2020 года і ўдзелам краіны ў расійскай агрэсіі супраць Украіны.