Па ўсёй Беларусі, акрамя Гродзенскай вобласці, аб’яўлены аранжавы ўзровень небяспекі з-за залеваў

28 ліпеня, Позірк. У сувязі з неспрыяльнымі з’явамі надвор’я на 29 ліпеня па ўсёй Беларусі, акрамя Гродзенскай вобласці, аб’яўлены аранжавы ўзровень небяспекі, вынікае з паведамлення Белгідрамета.

29 ліпеня ў многіх раёнах краіны чакаюцца навальніцы, месцамі моцныя залевы, пры навальніцах у асобных раёнах — шквалістае ўзмацненне ветру парывамі 15-20 м/с. У дзённы час па ўсходзе краіны максімальная тэмпература паветра дасягне +30…+32 °C. У Мінску чакаецца навальніца.

Аранжавы ўзровень небяспекі ва ўсёй краіне або асобных рэгіёнах аб’яўляецца Белгідраметам рэгулярна з 7 ліпеня. На 15 ліпеня аб’яўлялася штармавое папярэджанне і чырвоны, максімальны, узровень небяспекі па ўсёй краіне з-за залеваў.

Непагадзь, як правіла, прыводзіць да парушэння звыклага ўкладу жыцця ў сталіцы і рэгіёнах. У Мінску адбываецца падтапленне шэрагу вуліц, з-за чаго спыняецца або ўскладняецца рух грамадскага транспарту. Моцны вецер абрывае лініі электраперадачы.

Міністр па надзвычайных сітуацыях Вадзім Сіняўскі паведамляў, што пасля мінулага навальнічнага фронту ў ноч на 10 ліпеня на гарачыя лініі МНС паступіла 4,5 тыс. зваротаў па дапамогу.

10 ліпеня падзенне дрэва падчас непагадзі прывяло да гібелі жанчыны ў Магілёве, гэта адбылося каля 2 гадзін ночы на рацэ Дняпро. 32-гадовая жанчына разам з мужам напярэдадні вечарам прыехала на рыбалку.