Турчын на сустрэчы з Мішусціным адзначыў устойлівасць эканомікі РФ

24 ліпеня, Позірк. Нягледзячы на“ беспрэцэдэнтны санкцыйны ціск з боку калектыўнага Захаду”, эканамічнае супрацоўніцтва Беларусі і Расеі працягвае ўмацоўвацца, заявіў прэм’ер-міністр РФ Міхаіл Мішусцін на сустрэчы з беларускім калегам Аляксандрам Турчыным.

Кіраўнікі ўрадаў пагутарылі 24 ліпеня ў Горна-Алтайску (РФ), дзе праходзіць “міжнародная экалагічная канферэнцыя“.

“На ўзроўні ўрадаў, на мой погляд, адладжаная сістэмная праца ў выкананні пастаноў, якія прынятыя нашымі лідарамі і якія ў першую чаргу пабудаваныя на асноўных кірунках рэалізацыі Дамовы аб Саюзнай дзяржаве на 2024-2026 гады”, — цытуе Мішусціна прэс-служба расійскага Кабміна.

Паводле чыноўніка, ужо звыш 90% разлікаў бакі вядуць у нацыянальных валютах. Гэта “дапамагае абараніць” узаемны гандаль і інвестыцыі ад “негатыўнай знешняй кан’юнктуры“, дадаў расійскі прэм’ер.

Масква і Мінск, падкрэсліў Мішусцін, надаюць “прыярытэтную ўвагу” развіццю прамысловай кааперацыі.

“Мы паставілі знак роўнасці паміж паняццямі “расейская”і” беларуская прадукцыя”. Цяпер узаемна прызнаем вырабленыя ў Саюзнай дзяржаве камплектуючыя, кампаненты і канчатковую прадукцыю. Гэта вельмі важна”, — заявіў ён, дадаўшы, што краіны паскараюць рэалізацыю сумесных праектаў па імпартазамяшчэнні.

У сваю чаргу Турчын заявіў, што”на сённяшні дзень, якія б складанасці ні былі, эканоміка Расеі дэманструе ўстойлівасць — гэта напраўду вельмі значная рэч”.

“У нас шмат кантактаў на розных узроўнях. Таму магу адзначыць, што інтэнсіўнасць і плённасць нашай працы мяне задавальняюць у поўнай меры. Лічбавы парадак дня, мне здаецца, — гэта той кірунак, у якім нам трэба хутчэй ісці”, — падкрэсліў кіраўнік беларускага ўрада.

2 красавіка 1996 года першы прэзідэнт РФ Барыс Ельцын і Лукашэнка падпісалі дамову аб стварэнні супольнасці Беларусі і Расіі, 2 красавіка 1997-га — дагавор аб саюзе Беларусі і Расіі. 23 мая 1997 года быў прыняты Статут Саюза. 8 снежня 1999 года падпісаны Дагавор аб стварэнні Саюзнай дзяржавы, які ўступіў у сілу 26 студзеня 2000 года.

Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які займаў на той момант пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Менска з боку Масквы.

Яшчэ больш імкнення Крамля ўзмацніліся з 2020 года. Узмацненне інтэграцыі падтрымана беларускімі ўладамі.