КР узгадніла кандыдатуру Алісы Рыжычэнка на пасаду прадстаўніцы АПК па эканоміцы і фінансах

23 ліпеня, Позірк. Кандыдатура Алісы Рыжычэнка ўзгодненая на пасаду прадстаўніцы Аб’яднанага пераходнага кабінета (АПК) па эканоміцы і фінансах, паведамляе Каардынацыйная рада (КР).

Адзначаецца, што Рыжычэнка рэкамендавалі на гэтую пасаду фракцыі “Еўрапейскі выбар” і “Каманда Латушкі і “Рух За Свабоду”.

Прапанова падтрыманая 23 ліпеня 36 галасамі дэлегатаў КР (5 — супраць, 8 устрымалася).

“Рашэнне аб рэкамендацыі прызначыць Алісу Рыжычэнка на пасаду прадстаўніцы Аб’яднанага пераходнага кабінета па эканоміцы і фінансах будзе накіравана ў АПК”, — гаворыцца ў паведамленні КР.

Рыжычэнка скончыла Беларускі дзяржаўны эканамічны ўніверсітэт. Магістр эканомікі, эксперт сферы дзяржаўнага кіравання і міжнароднага развіцця. Пражывае ў Вене (Аўстрыя). Рэгулярна выступае ў незалежных СМІ з каментарыямі на эканамічную тэматыку.

Пасада прадстаўніка АПК па эканоміцы і фінансах вакантная з лістапада 2022 года. Раней яе менш за два месяцы займала прадпрымальніца Таццяна Зарэцкая.