Відавочцы: На мінулым тыдні у Лоеўскім раёне быў збіты дрон, над Рэчыцай самалёт пераследаваў БПЛА

Апублікавана на адкрытай версіі “Позірку” 16 ліпеня 2025 года ў 18:52

16 ліпеня, Позірк. На мінулым тыдні у Лоеўскім раёне быў збіты дрон, над Рэчыцай самалёт пераследаваў беспілотны лятальны апарат, паведамілі “Позірку” відавочцы.

Сяргей (тут і ніжэй імёны змененыя з меркаванняў бяспекі) распавёў, што бачыў, як БПЛА збілі над Лоеўскім раёнам, непадалёк ад вёскі Мохаў (8 км ад Лоева, 75 км ад Гомеля). “Гэта было ў ноч з 11 на 12 ліпеня. Ляцеў “шахед” з характэрным гукам, як мапед ці матацыкл. І ў небе непадалёк ад Мохава па ім стрэлілі, мне падалося, што з зенітнай устаноўкі, але я не ўпэўнены. Акурат на Дняпры былі рыбакі, яны спалохаліся”, — адзначыў суразмоўца.

Паводле яго слоў, супрацоўнікі сілавых структур аператыўна прыбралі парэшткі БПЛА.

Відавочца Артур у ноч на 10 ліпеня пабачыў, паводле яго выразу, бітву дрона і самалёта ў небе над Рэчыцай. “Я працаваў у начную змену, пачуў дзіўныя гукі, выйшаў паглядзець. Гук быў дакладна як ад БПЛА “Шахед”, ён кружыў над Рэчыцай, за ім ганяўся самалёт, але ці збілі БПЛА, не ведаю”, — заявіла крыніца.

Паводле інфармацыі ўкраінскага маніторынгавага каналу “Ринда моніторить”, вечарам 11 ліпеня БПЛА ляцеў у бок Беларусі праз Чарнігаўскую вобласць.

У распараджэнні “Позірку” ёсць відэазапіс, зроблены ноччу ў Гомельскай вобласці. На ім добра чуваць гук дрона. З меркаванняў бяспекі крыніцы відэазапіс не публікуецца.

Раней паведамлялася, што ў ноч на 10 ліпеня ў Гомельскую вобласць заляцела больш за 20 расійскіх БПЛА.