Сем чалавек пацярпелі ў ДТЗ у Полацкім раёне

15 ліпеня, Позірк. Пра дарожна-транспартнае здарэнне ў Полацкім раёне (Віцебская вобласць), у якім пацярпелі сем чалавек, паведаміла прэс-служба Міністэрства ўнутраных спраў.

Аварыя адбылася 15 ліпеня прыкладна а 14:20 на дарозе Р-20 “Віцебск — Полацк — мяжа Латвіі” каля вёскі Сякераўшчына.

“Паводле папярэдняй інфармацыі, 74-гадовы кіроўца Lada пры павароце налева не саступіў дарогу і здзейсніў сутыкненне з Volkswagen, які рухаўся насустрач, — адзначаецца ў рэлізе. — У выніку ДТЗ 25-гадовы таксіст і чацвёра яго пасажыраў атрымалі траўмы. Вадзіцель Lada і яго 71-гадовая жонка таксама дастаўлены ў медыцынскую ўстанову”.

Раней МУС паведамляла, што ноччу 14 ліпеня на трасе Р-88 “Жыткавічы — Давыд-Гарадок — мяжа Украіны” BMW пад кіраваннем 29-гадовага вадзіцеля сутыкнуўся з грузавіком ЗіЛ, які рухаўся ў тым жа напрамку. Вадзіцель легкавога аўтамабіля і яго 18-гадовы пасажыр загінулі на месцы, пазней у бальніцы памёр яшчэ адзін пасажыр — 30-гадовы мужчына.

Паводле маніторынгу даных Нацыянальнага статыстычнага камітэта, які правёў “Позірк”, у 2020 годзе ў ДТЗ былі параненыя 3.732 чалавекі, у 2021-м — 3.604, у 2022-м — 3.384, у 2023-м — 3.417, у 2024-м — 3.804.