Мінфін анансаваў у жніўні дзве замены еўрабондаў на беларускія дзяржаблігацыі

14 ліпеня, Позірк. Чарговыя замены беларускіх еўрааблігацый на лакальныя дзяржаўныя аблігацыі плануе ажыццявіць Міністэрства фінансаў у жніўні 2025 года, паведамляецца на сайце ведамства.

21 жніўня адбудзецца замена еўрааблігацый з пагашэннем 24 лютага 2026 года (Беларусь-2026, ISIN XS2120091991/US07737JAЕ38) і еўрааблігацый з пагашэннем 24 лютага 2031-га (Беларусь-2031; ISIN XS2120882183/US07737JAD54).

28 жніўня будзе ажыццёўлена замена еўрааблігацый з пагашэннем 28 лютага 2030-га (Беларусь-2030, ISIN XS1760804184/US07737JAC71).

Мінфін паведамляе, што ажыццявіць замену могуць толькі ўладальнікі еўрааблігацый, якія набылі каштоўныя паперы да 26 ліпеня 2024 года і забяспечаць іх блакаванне на рахунках Міністэрства.

Пры гэтым неабходную інфармацыю варта накіраваць у дэпазітарый-нерэзідэнт. Дадаткова кожны ўладальнік еўрааблігацый накіроўвае ў РУП “Рэспубліканскі цэнтральны дэпазітарый каштоўных папер” адпаведную заяўку на замену даўгавых абавязацельстваў.

Да працэдуры замены будуць дапушчаныя заяўкі, пададзеныя ўладальнікамі і верыфікаваныя ў парадку, вызначаным пастановай урада і Нацбанка ад 26 верасня 2022 года № 643/20 “Аб правядзенні асобных аперацый з дзяржаўнымі каштоўнымі паперамі”.

У апошні раз Мінфін зрабіў планавую замену аблігацый 26 чэрвеня. Тады гаворка ішла пра беларускія еўрабонды з тэрмінам пагашэння 29 чэрвеня 2027 года (Беларусь-2027, ISIN XS1634369224 / US07737JAA16)

Адзначалася, што аб’ём замены для 345 трымальнікаў, якія прайшлі верыфікацыю ў Рэспубліканскім цэнтральным дэпазітарыі каштоўных папер, склаў 39,7 млн долараў.

Працэс замяшчэння аблігацый анансаваў міністр фінансаў Юрый Селіверстаў 10 лістапада 2024 года.

Тады ён заявіў, што асноўная маса трымальнікаў беларускіх еўрабондаў, тэрмін выплаты па якіх на той момант ужо наступіў, свае грошы атрымала. “Знойдзены механізм, якім чынам яны пераводзяць на нашы рахункі аблігацыі, мы пераводзім ім у беларускіх рублях плацяжы, і гэты механізм працуе”, — сказаў Селіверстаў.

Пытанні пагашэння “тых папер, тэрмін пагашэння па якіх яшчэ не наступіў, але яны таксама па сутнасці заблакаваныя”, паводле слоў чыноўніка, будуць вырашацца шляхам выпуску “замяшчаючых аблігацый”.

28 чэрвеня 2022 года Савет міністраў і Нацыянальны банк прынялі сумесную пастанову, згодна з якой “выкананне даўгавых абавязацельстваў па дзяржаўных каштоўных паперах, размешчаных на знешніх фінансавых рынках, будзе ажыццяўляцца ў беларускіх рублях па курсе Нацбанка на дату плацяжу”.

З тых часоў Беларусь практыкуе пералік плацяжоў па даўгах у рублях на спецрахунак ў “Беларусбанку”.