У чэрвені МАЗ прадаў на расійскім рынку ў 2,6 раза менш новых грузавікоў, чым год таму
12 ліпеня, Позірк. У чэрвені 2025 года на расійскім рынку прададзена 199 новых грузавікоў Мінскага аўтамабільнага завода — у 2,6 раза менш, чым у тым жа месяцы 2024-га (515), гаворыцца ў даследаванні “АСМ-холдынг” (РФ).
Прадукцыя МАЗа ў мінулым месяцы заняла 7-е месца ў спісе самых прадаваных брэндаў гэтага сегмента аўтарынка Расіі, канстатавалі эксперты (у студзені, лютым і сакавіку было 6-е, у красавіку дзяліла 5—6-е, траўні — 4-е). Доля на рынку склала 5,2% (у траўні — 7,1%).
Лідарамі продажаў у справаздачным месяцы сталі: КамАЗ — 1.129 (-42,1% да чэрвеня 2024-га), SITRAK — 383 (-77,4%) і ГАЗ — 276 (-57,8%).
У першым паўгоддзі 2025 года беларускае прадпрыемства рэалізавала на рынку РФ 1.601 грузавік (2.844; -43,7%).
За мінулы год беларускае прадпрыемства збыло ў РФ 5.719 адзінак гэтай тэхнікі (за 2023 год — 6.406; -10,7%).
Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).
На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як ў цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.
