МУС правядзе на “Славянскім базары” паказальныя выступленні спецпадраздзяленняў і дзяцей з ваенна-патрыятычных клубаў

8 ліпеня, Позірк. Міністэрства ўнутраных спраў анансавала правядзенне ў рамках “Славянскага базару” ў Віцебску акцыі “За бяспеку — разам”.

Паведамляецца, што 10–13 ліпеня адбудуцца “паказальныя выступленні спецпадраздзяленняў МУС і выхаванцаў ваенна-патрыятычных клубаў”, і, у прыватнасці, “эмацыйнае спаборніцтва — “Забег у паўзунках”.

Таксама можна будзе “пракаціцца з міліцыянерамі на сегвеях, электраскутэрах і трыцыклах”.

Ведамства адзначае, што гасцей фестывалю чакаюць “скаладром, вяровачная пераправа, інтэрактыўны цір, выстава рэтра- і сучаснай тэхнікі, узбраення, роставыя фігуры і фотазоны”. Акрамя таго, можна будзе “азнаёміцца з дзейнасцю падраздзяленняў і ўстаноў адукацыі МУС, пакаштаваць салдацкай кашы і атрымаць асалоду ад канцэрта”.

Анансаваная арганізацыя паласы перашкод Bison Race, а “яскравым акордам свята”, паводле сцвярджэння МУС, “стане рэканструкцыя бою часоў Вялікай Айчыннай вайны”.

Распараджэнне аб правядзенні ў 2025 годзе Міжнароднага фестывалю мастацтваў “Славянскі базар у Віцебску” з 10 па 13 ліпеня Аляксандр Лукашэнка падпісаў 1 красавіка.

Як паведамляла яго прэс-служба, з улікам “існуючай практыкі дзяржаўнай падтрымкі” форуму для яго арганізатараў і ўдзельнікаў “прадугледжаныя асобныя льготы і прэферэнцыі”.

Таксама для гасцей фестывалю з 71 дзяржавы ў перыяд з 4 па 20 ліпеня 2025 года ўстаноўлены бязвізавы парадак уезду ў Беларусь, часовага знаходжання і выезду з краіны.

“Славянскі базар” праводзіцца ў Віцебску з 1992 года. У праграме фестывалю прадстаўлены розныя віды культуры і мастацтва — ад музыкі да выяўленчага мастацтва. Традыцыйна мае праўладную і прарасійскую скіраванасць.

На лістапад 2024 года ў сістэме Міністэрства ўнутраных спраў функцыянавала 159 ваенна-патрыятычных клубаў, дзе займалася больш за 5,5 тыс. дзяцей.

“Ваенна-патрыятычныя заняткі” з дзецьмі праводзяць дзейныя афіцэры, прапаршчыкі, кантрактнікі, а таксама вайскоўцы тэрміновай службы, заяўляў намеснік камандуючага ўнутранымі войскамі МУС Дзмітрый Мікша. “Асноўны ўпор” пры правядзенні гэтых заняткаў, паводле яго сцвярджэння, зроблены на тактычную, інжынерную і агнявую падрыхтоўку, ваенную тапаграфію, рукапашны бой.

20 лістапада мінулага года начальнік аддзела ўпраўлення маральна-псіхалагічнага забеспячэння галоўнага ўпраўлення ідэалагічнай працы Міністэрства абароны Уладзімір Ігнацік паведамляў, што ва ўстановах агульнай сярэдняй адукацыі Беларусі дзейнічае 155 ваенна-патрыятычных класаў.

У чэрвені 2024 года міністр адукацыі Андрэй Іванец заяўляў, што праца для “патрыятычнага, грамадзянскага выхавання” ў Беларусі “сёння пачынаецца ў дзіцячым садку”.

Улады ўзмацнілі ідэалагізацыю адукацыі пасля прэзідэнцкіх выбараў 2020 года, імаверна, ацаніўшы масавасць маладых нелаяльных грамадзян, якія ўдзельнічалі ў пратэстах.