Брат добраахвотніка Урбановіча не абскардзіў прысуд

7 ліпеня, Позірк. Максім Урбановіч, брат беларускага добраахвотніка з палка Каліноўскага Дзяніса Урбановіча, вырашыў не абскарджваць прысуд — 1,5 года пазбаўлення волі — і чакае этапу ў калонію, паведаміла “Позірку” крыніца, знаёмая з сітуацыяй.

27 чэрвеня суд Заводскага раёна Мінска за адзін дзень разгледзеў крымінальную справу палітвязня Максіма Урбановіча, узбуджаную паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).

Чакаецца, што Урбановіч будзе этапаваны ў калонію на наступным тыдні. “У якую менавіта, пакуль невядома”, — адзначыла крыніца.

Пра яго затрыманне стала вядома 2 красавіка. Адзначалася, што кватэру, у якой Максім Урбановіч пражываў са сваёй дзяўчынай, пасля ператрусу апячаталі. Спачатку Урбановіча ўтрымлівалі ў следчым ізалятары КДБ, а затым перавялі ў СІЗА № 1 у Калядзічах (Мінскі раён).

Паведамлялася, што ён мінімум два гады не падтрымлівае стасункаў з братам, які ваюе за Украіну.

У сакавіку 2024 года Максім Урбановіч быў арыштаваны на 10 сутак па абвінавачанні ў “дробным хуліганстве”. Праваабаронцы заяўлялі, што ён быў моцна збіты і змешчаны ў СІЗА КДБ.

Грамадскі актывіст Дзяніс Урбановіч некаторы час узначальваў “Малады фронт”, які быў заснаваны ў 1997 годзе як моладзевое крыло Беларускага народнага фронта. МФ ніколі не быў зарэгістраваны. У жніўні 2022 года беларускія ўлады прызналі яго “экстрэмісцкім фарміраваннем”.

У чэрвені 2020 года і сакавіку — красавіку 2021-га Дзяніс Урбановіч адбываў 15-сутачны арышт. У жніўні 2021 года яго затрымлівалі ў Нароўлі (Гомельская вобласць), падазравалі ў “арганізацыі масавых беспарадкаў” у Мазыры ў жніўні 2020-га.

Праз рызыку крымінальнага пераследу Дзяніс Урбановіч напрыканцы 2021 года нелегальна выехаў ва Украіну, пасля далучыўся да палка Каліноўскага. У траўні 2022 года быў цяжка кантужаны, у студзені 2023-га атрымаў раненні.