Суд Беластока прыгаварыў да пазбаўлення волі групу грамадзян Грузіі, якія перавозілі мігрантаў па “беларускім маршруце“

2 ліпеня, Позірк. Акруговы суд Беластока прыгаварыў да пазбаўлення волі групу з сямі грамадзян Грузіі, якія займаліся перакідкай нелегальных мігрантаў па “беларускім маршруце“, паведамляе Памежная ахова Польшчы.

Адзначаецца, што група дзейнічала са снежня 2022 года па красавік 2023-га. Мігрантаў дастаўлялі па тэрыторыі Беларусі да польскай мяжы, якую яны перасякалі пешшу па-за пунктамі пропуску. У Польшчы іх забіралі на машыне і адвозілі да мяжы з Германіяй.

Атрыманыя доказы суд палічыў дастатковымі для вынясення абвінаваўчага прысуду, гаворыцца ў прэс-рэлізе.

1 ліпеня Міністэрства ўнутраных спраў і адміністрацыі Польшчы заявіла, што дзякуючы намаганням урада Дональда Туска (працуе з 13 снежня 2023 года) удалося знізіць колькасць нелегалаў, якім удалося прайсці “беларускі маршрут“ (з усходу на захад Польшчы): з 12 тыс. у 2023 годзе да 5 тыс. у 2024-м і да 850 у першай палове 2025 года.

У гэты ж дзень Туск абвясціў аб часовым аднаўленні памежнага кантролю на наземнай мяжы Польшчы з Літвой і Германіяй (гэтыя краіны ўваходзяць у Шэнгенскае пагадненне). Кіраўнік польскага кабінета падкрэсліў неабходнасць “блакавання дзеянняў Пуціна і Лукашэнкі” ў працяг міграцыйнага крызісу.

Гл. падрабязней: Польскі прэм’ер Туск прыгразіў Лукашэнку “вельмі непрыемнымі і жорсткімі крокамі” ў адказ на працяг міграцыйнага крызісу

Паводле падлікаў “Позірку” (на падставе штодзённых афіцыйных даных польскіх уладаў), у першай палове 2025 года Польшча спыніла 14,6 тыс. спробаў незаконнага пранікнення з беларускай тэрыторыі.