Беларусь гатовая да ўсебаковай супрацы з усходнім урадам Лівіі, у тым ліку па пытаннях бяспекі
Сустрэча прадстаўнікоў Савета міністраў Беларусі з дэлегацыяй усходняга ўрада Лівіі
1 ліпеня, Позірк. Гатоўнасць Беларусі да ўсебаковай супрацы выказаў прэм’ер-міністр Аляксандр Турчын 1 ліпеня ў Мінску на сустрэчы з кіраўніком урада нацыянальнай стабільнасці (усходняга ўрада) Лівіі Усамай Хамадам.
Паводле слоў беларускага чыноўніка, перспектыўнымі для супрацы з’яўляюцца сферы сельскай гаспадаркі і харчовай бяспекі, прамысловасці, аховы здароўя і фармацэўтыкі, адукацыі і развіцця чалавечага капіталу, бяспекі і аховы правапарадку, прадухілення стыхійных бедстваў і ліквідацыі наступстваў надзвычайных сітуацый.
“Беларусь — высокатэхналагічная дзяржава, якая вырабляе сёння шырокую лінейку трактароў для розных мэт, пасажырскі і грузавы транспарт, сельскагаспадарчую, дарожна-будаўнічую і камунальную тэхніку і іншую сельскагаспадарчую і будаўнічую тэхніку”, — заявіў Турчын (на падставе відэафрагментаў у тэлеграм-канале прэс-службы Савета міністраў).
Канчатковая прадукцыя “адказвае ўсім сучасным патрабаванням, мае значны тэрмін службы, арганізаванае суправаджэнне тэхнікі з забеспячэннем сэрвіснага абслугоўвання і навучання персаналу”, сказаў беларускі прэм’ер.
Турчын адзначыў, што ў Беларусі развітая ахова здароўя. Паводле яго слоў, у беларускіх медустановах у 2024 годзе лячэнне атрымала тысяча грамадзян Лівіі. Агулам, звярнуў увагу чыноўнік, у іх лячыліся больш за 160 тыс. грамадзян са 159 краін.
Дэлегацыя Лівіі прыбыла ў Мінск 30 чэрвеня. 25 траўня паведамлялася, што ў Бенгазі (усходняя частка Лівіі) адкрыўся Дом Беларусі.
Беларуская дэлегацыя на чале з віцэ-прэм’ерам Віктарам Каранкевічам наведвала Бенгазі сёлета ў сакавіку і траўні.
Вярхоўны галоўнакамандуючы Лівійскай нацыянальнай арміі (ЛНА) Халіфа Хафтар наведваў Мінск у лютым 2025 года. Аляксандр Лукашэнка на сустрэчы з ім заявіў, што беларускія ўлады гатовыя “зрабіць усё”, што прадстаўнікі Лівіі “пабачаць карыснага ў Беларусі”.
Дэ-юрэ Лівія — адзіная дзяржава, але дэ-факта пасля звяржэння Муамара Кадафі ў 2011 годзе краіна апынулася падзеленай і цяпер кіруецца некалькімі цэнтрамі ўлады.
ААН і міжнародная супольнасць прызнае ўрад нацыянальнага адзінства (УНА) на чале з прэм’ер-міністрам Абдэлем Хамідам Дбэйбай, які кантралюе каля траціны Лівіі — сталіцу Трыпалі і прылеглыя тэрыторыі (заходняя частка дзяржавы).
Каля дзвюх трацін краіны знаходзіцца пад кантролем усходняга ўрада Усамы Хамада, які базуецца ў Бенгазі, Палаты прадстаўнікоў у Табруку, якая яго прызначыла, і ЛНА на чале з Хафтарам, што іх падтрымлівае. Акрамя Беларусі цэнтр улады ва ўсходняй частцы Лівіі падтрымлівае Расія, Егіпет, ААЭ ды інш.
Нягледзячы на тое, што УНА мае большую вагу на міжнароднай арэне, ва ўсходняга ўрада больш уплыву ўнутры краіны, у тым ліку дзякуючы кантролю над рэсурсамі і войскам.
