Звязаная з кумам Пуціна кампанія з 2024 года паставіла ў Беларусь больш за 700 вагонаў грузаў з акупаваных частак Украіны — БРЦ

1 ліпеня, Позірк. Зарэгістраваная ў РФ кампанія “Фларанс”, звязаная з прарасійскім украінскім палітыкам і бізнесменам Віктарам Мядзведчуком, з 2024 года паставіла ў Беларусь больш за 700 вагонаў розных грузаў, вынікае з новага матэрыялу Беларускага расследавальніцкага цэнтра (БРЦ).

Згодна з дакументамі, да якіх атрымала доступ “Супольнасць чыгуначнікаў Беларусі”, гэтыя грузы вывозяць з акупаваных Расіяй тэрыторый Украіны — адпаведных частак Данбаса (прамысловы рэгіён уключае Данецкую і часткова Луганскую вобласці), Запарожскай і Херсонскай абласцей. Адзначаецца, што грузы па чыгунцы перавозяцца ў РФ, а адтуль — у Беларусь.

Пераважна гэта была металічная і мінеральная сыравіна, напрыканцы 2024 года да іх дадаўся высокавугляродзісты від вугалю — антрацыт (9 вагонаў з ім у чацвёртым квартале даставілі для Скідальскага цукровага камбіната). Паводле інфармацыі расследавальнікаў, непасрэдна летась прыбыла 674 вагоны.

У першым квартале 2025 года беларускія прадпрыемствы пры пасярэдніцтве “Фларанс” атрымалі 30 вагонаў грузаў. 14 з іх — з рознымі сталёвымі вырабамі — прыняла ТДА “Металургічная кампанія Прамбудметал”. Грузы таксама атрымаў Асіповіцкі завод транспартнага машынабудавання (АЗТМ) і прадпрыемства “Гомельбудматэрыялы”.

Паводле інфармацыі расследавальнікаў, асноўныя беларускія спажыўцы тавараў, якія паступаюць праз “Фларанс”, — БелАЗ, АЗМТ і “Керамін”.

Звязаны з “Фларанс” Мядзведчук ва Украіне абвінавачваецца ў дзяржаўнай здрадзе. Неўзабаве пасля пачатку поўнамаштабнай расейскай агрэсіі яго затрымала Служба бяспекі Украіны. У верасні таго ж года Кіеў аддаў Маскве бізнесмена і яшчэ 55 расійскіх ваеннапалонных, наўзамен вярнуўшы 215 сваіх вайскоўцаў.

Прэзідэнт Расіі Уладзімір Пуцін з’яўляецца хросным бацькам дачкі Мядзведчука Дар’і (хросная маці — жонка намесніка старшыні Савета бяспекі РФ Дзмітрыя Мядзведзева Святлана Мядзведзева).

Украінскія журналісты з Slidstvo.Info і KibOrg, паводле інфармацыі БРЦ, высветлілі, што кампанія Мядзведчука вывозіла ўкраінскае збожжа ў 2023 годзе і на працягу 2024-га абслугоўвала крымскі тытанавы бізнэс.

Яшчэ ў траўні 2021 года журналісты высветлілі, што кампанія Мядзведчука супрацоўнічае з фірмамі аднаго з “кашалькоў” Аляксандра Лукашэнкі — саўладальніка “Брэміна-Груп” Мікалая Вараб’я, які знаходзіцца пад санкцыямі Еўрапейскага саюза. У лістападзе 2023 года Еўрапейскі суд у Люксембургу адмовіўся зняць санкцыі з Вараб’я і “Брэміна-Груп”.

У расследаванні падкрэсліваецца, што “краіна-акупант не мае права вывозіць прадукцыю або рэсурсы з акупаванай тэрыторыі”. Такія дзеянні могуць разглядацца як марадзёрства, паводле арт. 55 Гаагскай канвенцыі.