Дэлегацыя з Лівіі прыбыла ў Мінск для “ўмацавання супрацоўніцтва па шэрагу кірункаў”

30 чэрвеня, Позірк. Аб прыбыцці ў Мінск 30 чэрвеня “ўрадавай дэлегацыі Лівіі” паведамляюць дзяржСМІ.

Прыбылых з Лівіі сустракаў у Нацыянальным аэрапорце Мінск віцэ-прэм’ер Віктар Каранкевіч.

Адзначаецца, што “ў рамках візіту” плануецца “шэраг сустрэч з вышэйшымі службовымі асобамі Беларусі, наведванне беларускіх прадпрыемстваў, устаноў адукацыі і медыцынскіх арганізацый”.

“Мэта цяперашняй сустрэчы — умацаванне супрацоўніцтва па шэрагу кірункаў”, — заяўляюць дзяржаўныя медыя.

25 траўня паведамлялася аб цырымоніі адкрыцця Дома Беларусі, якая адбылася ў Бенгазі (усходняя частка Лівіі). Паводле слоў Каранкевіча, які ўдзельнічаў у цырымоніі, аб’ект стане “месцам прыцягнення суб’ектаў гаспадарання, бізнес-колаў, дзе будзе магчымасць правядзення сустрэч, абмеркавання канкрэтных кантрактаў і іх заключэння”.

“Прамысловасць, сельская гаспадарка, ахова здароўя, — удакладніў чыноўнік. — Бакі маюць намер развіваць супрацоўніцтва па многіх напрамках. Паглыбіць супрацоўніцтва дамовіліся і па лініі парламентаў”.

Аб працоўным візіце ва ўсходнюю частку Лівіі дэлегацыі на чале з Каранкевічам паведамлялася 24 траўня.

“Плануецца абмеркаванне развіцця ў эканамічнай, гуманітарнай, сацыяльнай сферах, а таксама актывізацыя ўзаемадзеяння паміж парламентамі дзвюх краін, — заявіў віцэ-прэм’ер. — Прадугледжваюцца сустрэчы, каб падвесці папярэднія ўжо вынікі дзейнасці, а таксама актывізаваць працу па асноўных кірунках, а таксама актывізаваць пра па асноўных кірунках, якія дазволяць у цэлым забяспечыць безумоўнае выкананне дамоўленасцей, дасягнутых на ўзроўні кіраўніка нашай дзяржавы — паважанага Аляксандра Рыгоравіча Лукашэнкі — і фельдмаршала Лівіі спадара Хафтара”.

Вярхоўны галоўнакамандуючы Лівійскай нацыянальнай арміі (ЛНА) Халіфа Хафтар наведваў Мінск у лютым 2025 года. Лукашэнка на сустрэчы з ім заявіў, што беларускія ўлады гатовыя “зрабіць усё”, што прадстаўнікі Лівіі “ўбачаць карыснага ў Беларусі”.

Дэлегацыя Беларусі на чале з Каранкевічам наведвала Бенгазі ў сакавіку. Тады візіцёры прэзентавалі “магчымасці беларускай нафтаперапрацоўкі”, абмеркавалі супрацу ў галіне геолагаразведкі ды інш.

Дэ-юрэ Лівія — адзіная дзяржава, але дэ-факта пасля звяржэння Муамара Кадафі ў 2011 годзе краіна апынулася падзеленай і цяпер кіруецца некалькімі цэнтрамі ўлады.

ААН і міжнародная супольнасць прызнае ўрад нацыянальнага адзінства (УНА) на чале з прэм’ер-міністрам Абдэлем Хамідам Дбэйбам, які кантралюе каля траціны Лівіі — сталіцу Трыпалі і прылеглыя тэрыторыі (заходняя частка дзяржавы).

Каля дзвюх трацін краіны знаходзіцца пад кантролем усходняга ўрада Усамы Хамада, які базуецца ў Бенгазі, Палаты прадстаўнікоў у Табруку, якая яго прызначыла, і ЛНА на чале з Хафтарам, што іх падтрымлівае. Акрамя Беларусі цэнтр улады ва ўсходняй частцы Лівіі падтрымлівае Расія, Егіпет, ААЭ ды інш.

Нягледзячы на ​​тое, што УНА мае большую вагу на міжнароднай арэне, ва ўсходняга ўрада больш уплыву ўнутры краіны, у тым ліку дзякуючы кантролю над рэсурсамі і войскам.