Беларусы павінны “маліцца на ўладу” за тое, што не ваююць, заяўляе Лукашэнка, які падтрымлівае агрэсію РФ ва Украіне
30 чэрвеня, Позірк. Пра неабходнасць дамагацца “кадравай дысцыпліны і выніку” заявіў Аляксандр Лукашэнка, звяртаючыся да прызначаных 30 чэрвеня прадстаўнікоў мясцовай вертыкалі ўлады.
“Мы ўсё парымся: ах, там нейкую дэмакратыю, свабоду хочам! Якая свабода? Добра працуеш — <…> будзем падтрымліваць, узнагароджваць… Але калі ты лайдак, калі ў цябе няма выніку, падзеж [жывёлы]… За гэта павінна быць жорсткая адказнасць знізу даверху”, — цытуе Лукашэнку яго прэс-служба.
“Я чаму так жорстка стаўлю пытанне, — дадаў ён. — Ужо многія [скардзяцца]: вось, прыгоннае права, прыгоннае права… Слухайце, мужыкі, сёння сітуацыя ваенная. Тое, што мы не ваюем, — народ павінен на гэтую ўладу маліцца, што мы яшчэ неяк трымаемся. Вы бачыце, што навокал. Як толькі ўнутры пойдуць праблемы, нам іх ўзмоцняць, нам падкінуць. Вакол Беларусі сядзяць, як змеі падкалодныя, шыпяць, гатовыя сюды рынуцца. Таму давайце будзем прымаць рашэнні і вырашаць пытанні, якія на паверхні”.
Паводле слоў Лукашэнкі, мясцовыя органы ўлады сёння павінны “дзейнічаць”, бо “такая сітуацыя”. Пры гэтым, калі нават у іх “не атрымаецца” дамагчыся выніку, “людзі гэта ацэняць”.
“Людзі ўбачаць, што ну так, ну не атрымалася. Па розных прычынах жа, аб’ектыўна не атрымліваецца. Яны нам даруюць гэтыя недапрацоўкі і памылкі. Але калі мы нічога рабіць не будзем, людзі нам гэтага не даруюць”, — удакладніў ён.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Уварванне на ўкраінскую тэрыторыю было ажыццёўлена ў тым ліку з Беларусі. На пачатковым этапе агрэсіі РФ выкарыстала для вядзення вайны беларускую вайсковую і грамадзянскую інфраструктуру, з тэрыторыі Беларусі вяліся ракетныя абстрэлы ўкраінскіх гарадоў. Лік загінуўшых у гэтай вайне ідзе на сотні тысяч чалавек.
21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Лукашэнка прызнаў, што з Беларусі ва Украіну была ўведзеная 20-тысячная групоўка расійскіх войскаў. Пасля паўночныя тэрыторыі былі вызваленыя.
11 красавіка 2023 года першы намеснік міністра абароны Украіны Аляксандр Паўлюк заявіў, што ў пачатку вайны 70 тыс. вайскоўцаў 35-й агульнавайсковай арміі РФ на 7 тыс. бронемашынах “з беларускай мяжы ўварваліся” на тэрыторыю Кіеўскай вобласці.
У інтэрв’ю “Бі-бі-сі” 23 кастрычніка 2024 года Лукашэнка стаў адмаўляць, што Беларусь прадаставіла РФ тэрыторыю для ўварвання. Паводле яго слоў, Расія нібыта выводзіла свае войскі, якія знаходзіліся на беларускай тэрыторыі ў перыяд вучэнняў, але іх “справакавалі”, у выніку чаго прэзідэнт РФ Уладзімір Пуцін “завярнуў на Кіеў”. Навошта гэта нібыта было зроблена, Лукашэнка параіў “спытаць у Зяленскага”.
