ЗША ніколі не будуць прасіць Беларусь зрабіць нешта на шкоду Расіі — Рыбакоў

23 чэрвеня, Позірк. Аляксандр Лукашэнка на сустрэчах з прадстаўнікамі ЗША “кожны раз падкрэслівае, што мы як краіна, як найбліжэйшы стратэгічны саюзнік, партнёр і Расійскай Федэрацыі, і Кітайскай Народнай Рэспублікі ніколі не будзем нічога рабіць на шкоду гэтым краінам“. Пра гэта заявіў пастаянны прадстаўнік Беларусі пры ААН Валянцін Рыбакоў у інтэрв’ю тэлеканалу “Беларусь 1“.

“Амерыканскі бок гэта разумее, усведамляе, прызнае, і, трэба прызнаць, што нават на апошняй сустрэчы было падкрэслена з боку амерыканскай дэлегацыі, што да Беларусі ніколі не будуць звернутыя просьбы ЗША зрабіць нешта на шкоду перш за ўсё Расійскай Федэрацыі. Што вельмі важна і вельмі каштоўна, таму што гэта проста падкрэслівае разуменне амерыканскім бокам нашай ролі ў сітуацыі“, — сказаў дыпламат.

Паводле яго слоў, “на больш раннім этапе” часта гучалі абвінавачванні ў адрас Беларусі ў тым, што яна суагрэсар і “ледзь не прамыя ўдзельнікі [вайны] і гэтак далей…“. “Я магу смела сказаць, што ў Вашынгтоне ёсць поўнае разуменне сапраўднай рэальнай ролі Рэспублікі Беларусь і прэзідэнта Рэспублікі Беларусь у тым, што адбываецца ў нас у рэгіёне“, — заявіў пастпрад.

2 красавіка 1996 года першы прэзідэнт РФ Барыс Ельцын і Лукашэнка падпісалі дамову аб стварэнні супольнасці Беларусі і Расіі, 2 красавіка 1997-га — дагавор аб саюзе Беларусі і Расіі. 23 траўня 1997 года быў прыняты статут Саюза. 8 снежня 1999 года падпісаны Дагавор аб стварэнні Саюзнай дзяржавы, які набыў моц 26 студзеня 2000 года.

Расійскае ваеннае ўварванне ва Украіну 24 лютага 2022 года ажыццяўлялася ў тым ліку з тэрыторыі Беларусі, што дае падставу як Украіне, так і краінам Захаду лічыць яе саўдзельнікам агрэсіі.