Лукашэнка разлічвае на крокі ў адказ, без добрасуседскіх адносін можам апынуцца ў вельмі цяжкай сітуацыі — Церцель

22 чэрвеня, Позірк. Вызваліўшы групу палітвязняў, у тым ліку грамадзян іншых краін, рэжым Лукашэнкі разлічвае на крокі ў адказ, вынікае з выказванняў старшыні Камітэта дзяржбяспекі Беларусі Івана Церцеля ў інтэрв’ю беларускаму дзяржаўнаму тэлебачанню. Пры гэтым ён заявіў, што ў краіне “няма палітычных зняволеных, няма такой катэгорыі“.

“Мы павінны развіваць усё ж такі добрасуседскія стасункі з рознымі краінамі і дээскаляваць гэтую сітуацыю, таму што, калі не будзе прынята, нават па сённяшніх падзеях, нейкіх кардынальных рашэнняў, каб знайсці кансэнсус, мы можам апынуцца, усё можам апынуцца ў вельмі, вельмі цяжкай сітуацыі, наступствы якой мы не можам нават прадугледзець у цяперашні час“, — сказаў Церцель.

“Таму, так, было прынята рашэнне ў дачыненні да шэрагу, як вы памятаеце па паведамленнях, якія былі, у гэтым спісе было шмат грамадзян замежных дзяржаў, падданых Японіі, Польшчы, некаторых іншых дзяржаў, — адзначыў кіраўнік ведамства. — Гэтыя асобы асуджаныя, многія з іх асуджаныя за злачынствы, звязаныя са шпіянажам супраць нашай дзяржавы, звязаныя са здзяйсненнем злачынстваў у сферы забеспячэння бяспекі Рэспублікі Беларусь, у сферы працы на замежныя спецслужбы“.

Пасля сцвярджэння, што ў Беларусі няма палітвязняў, Церцель, кажучы пра вызваленне 14 асуджаных, заявіў, што “ў дачыненні да асобных з гэтых асоб сямейныя абставіны пераважалі“. “Кіраўнік дзяржавы наш пайшоў па просьбе амерыканскай адміністрацыі на гэты крок, разумеючы, што гэта прывядзе ўсё ж такі да пэўных у адказ, напэўна, крокаў іншых дзяржаў, што мы агулам даможамся нейкага кансенсусу і ў Еўропе ў нас будзе спакойна, дойдзем да вырашэння пытанняў у канструктыўным рэчышчы“, — сказаў старшыня КДБ.

“Гэта вось мерапрыемства, якое было днямі, — гэта толькі адно з вельмі, вельмі многіх. А кантактаў у кіраўніка дзяржавы, у тым ліку на самым высокім узроўні, на высокім узроўні, ёсць, і іх шмат, і, вядома, пакуль не час пра іх гаварыць, але з часам мы распавядзем. Я думаю, што вось гэты жэст, які наш кіраўнік дзяржавы праявіў да суседзяў, нягледзячы на іх палітыку не зусім добрасуседскую і ўзважаную і не на карысць іх народам, і вось тыя пасылы, якія гэтым наш кіраўнік дзяржавы накіраваў ім, яны будуць пачутыя і мы ўбачым такі ж падыход добрасуседскі з іх боку“, — заявіў Церцель, дадаўшы: “Кажуць, што надзея памірае апошняй, мы будзем спадзявацца, што не ў гэтым выпадку“.