Беларус паспрабаваў незаконна ўвезці ў Польшчу амаль 10 тон кантрабанднага тытуню

19 чэрвеня, Позірк. Спробу кантрабанды 10 тон сушанага курыльнага тытуню без польскіх акцызных марак у Сувалках, недалёка ад мяжы з Літвой і Беларуссю, спынілі супрацоўнікі Нацыянальнай падатковай адміністрацыі Польшчы, паведамляе “TVP3 Беласток“.

Вытворца тытуню не называецца. Удакладняецца, што незаконны тавар быў схаваны ў спыненым для праверкі грузавіку з літоўскімі рэгістрацыйнымі нумарамі сярод грузу шклаваты, за рулём аўтамабіля знаходзіўся грамадзянін Беларусі. Кошт канфіскаванага тытуню ацэньваецца прыкладна ў 9 млн злотых (больш за 2,4 млн долараў).

На сайце Палаты фіскальнага кіравання Мазавецкага ваяводства паведамляецца, што страты дзяржаўнага бюджэту, звязаныя з незаконнай перавозкай тытуню, складаюць блізу 14 млн злотых (амаль 3,8 млн долараў). Канфіскаваны тытунь быў змешчаны на дэпазітны склад.

Расследаванне крымінальнага злачынства праводзіць Мазавецкае мытна-падатковае ўпраўленне пад наглядам акруговай пракуратуры ў Сувалках. Пра затрыманне кіроўцы польскі бок не паведамляе, што, магчыма, звязана з чаканнем рашэння суда.

Літоўская памежная служба 18 чэрвеня паведаміла аб перахопе двух дронаў з беларускімі цыгарэтамі. Кошт абедзвюх затрыманых партый, уключаючы ўсе падаткі, якія падлягаюць выплаце ў Літве, складае амаль 7 тыс. еўра.

Усяго з пачатку гэтага года літоўскія памежнікі канфіскавалі 27 дронаў, якія перавозілі партыі цыгарэт з тэрыторыі Беларусі, а ў 2024 годзе кантрабандысты такім чынам страцілі 54 дроны.