Лідары краін G7 маюць намер супрацьдзейнічаць транснацыянальным рэпрэсіям
18 чэрвеня, Позірк. Глыбокую занепакоенасць “усё больш частымі паведамленнямі пра транснацыянальныя рэпрэсіі” (ТНР) выказалі лідары краін G7 (“Вялікая сямёрка”) па выніках сустрэчы 17 чэрвеня ў канадскім Кананаскісе.
У адпаведнай заяве гаворыцца, што ТНР з’яўляюцца “агрэсіўнай формай замежнага ўмяшання, пры якой дзяржавы або іх пасярэднікі спрабуюць запалохаць, пераследаваць, нанесці шкоду або прымусіць да дзеянняў асобных людзей або супольнасці па-за межамі сваіх рубяжоў”.
Транснацыянальныя рэпрэсіі, адзначана ў дакуменце, “падрываюць нацыянальную бяспеку, дзяржаўны суверэнітэт, бяспеку і правы чалавека ахвяр, а таксама прынцыпы міжнароднага права”. ТНР, звярнулі ўвагу лідары G7, “часта закранаюць дысідэнтаў, журналістаў, праваабаронцаў, рэлігійныя меншасці і тых, хто ідэнтыфікуецца як частка дыяспар”.
Падпісанты заявы асуджаюць “усе акты транснацыянальных рэпрэсій”, сярод якіх “пагрозы або акты фізічнага гвалту, такія як пераслед, напад, выкраданне або забойства; злоўжыванне супрацай з іншымі замежнымі дзяржавамі, міжнароднымі органамі і міжурадавымі арганізацыямі з мэтай затрымання, прымусовага вяртання або падаўлення цэляў, напрыклад, выкарыстоўваючы экстэрытарыяльнае заканадаўства і контртэрарыстычныя і следчыя інструменты; прымусовае вяртанне шляхам адабрання пашпартоў, анулявання дакументаў або адмовы ў консульскіх паслугах”.
Лідары G7 таксама асуджаюць лічбавыя ТНР — “распаўсюд асабістай інфармацыі і сэксуалізаваныя паклёпніцкія кампаніі, асабліва накіраваныя на жанчын, з мэтай прымусу, маўчання, запалохвання, дыскрэдытацыі ці помсты; прамыя або ўскосныя пагрозы на адрас членаў сям’і”.
“Мы таксама занепакоеныя пагрозамі з боку замежных дзяржаў і іх пасрэднікаў нашым грамадзянам па-за межамі нашых рубяжоў, такімі як адвольныя затрыманні, — гаворыцца ў заяве. — Мы прызнаем важную ролю ўсіх партнёраў, уключаючы грамадзянскую супольнасць, акадэмічныя колы і прыватны сектар, у процідзеянні гэтай пагрозе. Мы вітаем рэкамендацыі да дзеянняў, якія вынікаюць са Шматбаковага дыялогу G7 па транснацыянальных рэпрэсіях, праведзенага ў Атаве ў лютым 2025 года, па распрацоўцы канкрэтных стратэгій абароны тых, хто з’яўляецца мішэнню”.
Лідары G7 абавязваюцца “садзейнічаць агульнаму разуменню ТНР, падвышаць дасведчанасць і прасоўваць падсправаздачнасць, каб павялічыць цану для тых, хто здзяйсняе акты ТНР”. У гэтым плане яны маюць намер садзейнічаць “глабальнаму разуменню пагрозы і яе разбуральнага ўздзеяння, у тым ліку на правы чалавека і дэмакратыю”.
Палітыкі таксама маюць намер “распрацаваць рамачную праграму ўстойлівасці і рэагавання на ТНР”, якая будзе ўключаць “меры па ўзмацненні супрацы G7 у супрацьдзеянні ТНР”, “зборнік лепшых практык у галіне аператыўнай, дыпламатычнай, палітычнай, заканадаўчай і грамадскай працы”, “абмен інфармацыяй пра апошнія тэхнікі, тэндэнцыі і вектары ТНР”.
Плануецца таксама “запусціць Акадэмію лічбавага выяўлення ТНР праз Механізм хуткага рэагавання G7 для фармавання калектыўнай здольнасці выяўляць ТНР у інтэрнэце”; “падтрымліваць тых, хто можа быць мішэнню ТНР, а таксама членаў грамадзянскай супольнасці, якія актыўна працуюць супраць гэтай пагрозы, у тым ліку праз такія ініцыятывы, як Канада-брытанскі фонд кібербяспекі “Агульная карысць”.
“Мы падвоім нашыя намаганні па гарантаванні бяспекі нашых супольнасцяў, абароне правоў чалавека, у тым ліку свабоды выказвання меркаванняў у інтэрнэце і афлайн, і абароне нашага суверэнітэту”, — гаворыцца ў заяве.
Праблема транснацыянальных рэпрэсій актуальная для беларусаў, што былі вымушаныя пакінуць сваю краіну праз рызыку палітычнага пераследу.
Для пераследу грамадзян Беларусі, якія знаходзяцца за мяжой, рэжым Аляксандра Лукашэнкі ўвёў у практыку працэдуру спецыяльнай вытворчасці. Яна дае магчымасць праводзіць завочныя суды па крымінальных справах, выносіць прыгаворы, адбіраць маёмасць грамадзян, што пакінулі радзіму.
Шырока прымяняецца ў дачыненні да ідэйных праціўнікаў уладаў. Спецвытворчасць нярэдка распачынаюць за дзеянні, якія рэжым Лукашэнкі лічыць незаконнымі, здзейсненыя па-за межамі Беларусі.
Латушка абмеркаваў з кіраўніцтвам ЕСЗД праблему пераследу беларусаў за мяжой з боку рэжыму Лукашэнкі
7 чэрвеня, Позірк. Праблему пераследу рэжымам Аляксандра Лукашэнкі беларусаў, якія вымушана пакінулі радзіму і пражываюць на тэрыторыі Еўрасаюза, абмеркаваў намеснік кіраўніцы Аб'яднанага пераходнага кабінета, кіраўнік Народнага антыкрызіснага ўпраўлення Павел Латушка з намесніцай гендырэктара Еўрапейскай службы знешніх дзеянняў (ЕСЗД) Даротай Длоўхі-Сулігай. Прэс-служба беларускага …
