10 чэрвеня, Позірк. Пра прыбыццё ў Ліван беларускай урадавай дэлегацыі на чале з віцэ-прэм’ерам Віктарам Каранкевічам паведаміла 10 чэрвеня прэс-служба Савета міністраў.
Адзначаецца, што прадстаўнікі Мінска і Бейрута маюць намер абмеркаваць “спосабы і шляхі ўмацавання двухбаковай супрацы па шэрагу напрамкаў”.
“Узаемныя інтарэсы маюцца ў сферы прамысловасці, сельскай гаспадаркі, будаўніцтва, а таксама стварэння інфраструктуры, у тым ліку лагістычнай, — гаворыцца ў паведамленні. — Акрамя таго, чакаецца, што бакі абмяняюцца думкамі па міжнародных тэмах і звераць гадзіннікі на парламенцкім трэку”.
“Стасункі з гэтай краінай развіваюцца планамерна і на перспектыву. Ліван можа стаць плацдармам для развіцця і прасоўвання беларускай прадукцыі на Блізкім Усходзе”, — лічаць ва ўрадзе.
Сёлета ў лютым Ліван наведваў міністр замежных спраў Максім Рыжанкоў. Чыноўнік перадаў ліванскаму прэзідэнту Жазэфу Ауну запрашэнне ад Аляксандра Лукашэнкі наведаць Беларусь, выказаў спадзеў на “пашырэнне” стасункаў.
У Ліване прэзідэнта абірае парламент. Пазіцыя кіраўніка дзяржавы была вакантнай два гады.
9 студзеня 2025 года камандуючы Узброенымі сіламі Жозэф Аун быў абраны прэзідэнтам, нягледзячы на канстытуцыйную забарону для суддзяў і дзяржслужачых першай катэгорыі абірацца на гэтую пасаду на працягу тэрміна паўнамоцтваў.
