У Кіеўскім нацыянальным універсітэце адкрыецца выстава “Гісторыя беларускага супраціву”
9 чэрвеня, Позірк. Выстава “Гісторыя беларускага супраціву” адкрыецца 12 чэрвеня ў чырвоным корпусе Кіеўскага нацыянальнага ўніверсітэта імя Тараса Шаўчэнкі, паведаміў на сваёй старонцы ў “Фэйсбуку” кіраўнік дабрачыннага фонду “Свабодная Беларусь” Аляксей Францкевіч.
Паводле яго слоў, “гэта не проста выстава” — гэта “гісторыя амаль 30-гадовай барацьбы беларусаў з дыктатурай і спробамі далучэння Беларусі да Расіі”.
“Успомнім, як беларусы ўнутры краіны супраціўляліся прасоўванню расійскіх войскаў ва Украіну пасля пачатку поўнамаштабнага ўварвання — і працягваюць змагацца па гэты дзень”, — адзначыў Францкевіч.
Таксама ён анансаваў 12 чэрвеня правядзенне круглага стала, на якім будуць абмяркоўвацца “агульная гісторыя” Беларусі і Украіны, “агульны досвед барацьбы і агульны вораг”.
Што складзе экспазіцыю выставы, кіраўнік фонду не ўдакладніў.
9 верасня мінулага года Францкевіч паведаміў, што ў Львове адкрыўся Беларускі дом і на яго базе музей “Свабодная Беларусь з Украінай у сэрцы”. Паводле слоў Францкевіча, мэта праекта — “распавесці ўсяму свету пра тое, што беларуская нацыя бок аб бок з украінцамі стаіць на абароне ўсяго цывілізаванага свету ад Расійскай імперыі”.
Музей прысвечаны беларусам, якія аддалі свае жыцці ва Украіне, пачынаючы з падзей на Майдане Незалежнасці ў 2014 годзе падчас Рэвалюцыі Годнасці і пазней у расійска-украінскай вайне.
23 ліпеня 2024 года рэктар Кіеўскага нацыянальнага ўніверсітэта ім. Шаўчэнкі Уладзімір Бугроў паведаміў, што ў ВНУ будзе адноўлена выкладанне беларускай мовы.
Кіеўскі нацыянальны універсітэт ім. Шаўчэнкі — адзін з найбуйнейшых ВНУ Украіны, Нацыянальны цэнтр навукі і культуры, адзін з найстарэйшых універсітэтаў краіны. Заснаваны ў 1834 годзе.
