У Наваполацку адкрыюць царкву для дзяцей у гонар рускага святога — з хорам, трапезнай і кіназалай
9 чэрвеня, Позірк. Праваслаўны храм, у якім “асноўнымі прыхаджанамі стануць дзеці”, плануецца адкрыць у Наваполацку (Віцебская вобласць), паведаміў біскуп Полацкі і Глыбоцкі Ігнацій, выступаючы на выязным пашыраным пасяджэнні прэзідыума Савета Рэспублікі Нацыянальнага сходу (СР НС).
Пасяджэнне прайшло 9 чэрвеня ў Полацку (Віцебская вобласць), паведамляе прэс-служба верхняй палаты парламента.
Паводле слоў Ігнація, новая царква “зможа стаць цэнтрам духоўнага развіцця”.
“Мы пераабсталюем дзіцячы сад № 6 у духоўны цэнтр з храмам у гонар прападобнага Сергія Раданежскага — апекуна навучэнцаў”, — сказаў прадстаўнік Беларускай праваслаўнай царквы.
“Дзіцячы хор з Наваполацка будзе выконваць набажэнствы. Іканастас будзе зроблены так, каб праглядалася ўсё, што адбываецца ў алтары. Дзеці атрымаюць наглядны вучэбны дапаможнік. Акрамя таго, у гэтым цэнтры духоўнага развіцця будуць класы для занятку музыкай, нядзельная школа для збору моладзевых брацтваў, а таксама актавая зала з кіназалай”, — дадаў біскуп.
Паводле яго сцвярджэння, многія дзеці “ведаюць і глядзяць розныя фільмы, дзе ў лёгкай і даступнай форме распавядаецца пра жыццё святароў, кінастужкі на духоўную тэматыку з глыбокім зместам”.
!Там будзе яшчэ і трапезная. Мы назвалі яе моладзевым кафэ. У зале змогуць сядзець па шэсць-восем чалавек за столікам, каб сем’і прыходзілі, дзяцей аддавалі на заняткі ў нядзельнай школе, а самі бацькі маглі перакусіць і пагутарыць”, — адзначыў Ігнацій.
Адзначаецца, што старшыня СР НС Наталля Качанава назвала ініцыятыву “добрай”, бо яна “дапаможа далучыць падрастаючае пакаленне да традыцыйных праваслаўных каштоўнасцяў”.
Сергій Раданежскі — ігумен Рускай царквы, заснавальнік шэрагу манастыроў, у тым ліку Свята-Траецкага манастыра пад Масквой (цяпер Троіца-Сергіева лаўра). Жыў у 14-м стагоддзі. Шануецца Рускай праваслаўнай царквой як святы у абліччы прападобных.
4–6 чэрвеня Беларусь наведваў патрыярх Маскоўскі і ўсяе Русі Кірыл (Гундзяеў). Паведамлялася аб правядзенні ім набажэнстваў у Свята-Духаўскім кафедральным саборы ў Мінску і Крыжа-Узвіжанскім саборы Спаса-Еўфрасіннеўскага жаночага манастыра ў Полацку.
Некаторыя ініцыятывы Беларускай Праваслаўнай Царквы наўпрост падтрымліваюць “рускі мір” і расійскую вайсковую агрэсію ва Украіне. Напрыклад, Свята-Елісавецінскі манастыр арганізуе канцэрты ў падтрымку Расійскай арміі і збірае харчы і сродкі для расійскіх вайскоўцаў.
Публічна манастыр паведамляе пра “гуманітарную дапамогу” жыхарам Данбаса.
Праваслаўе дамінуе сярод канфесій у Беларусі.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Патрыярх Кірыіл неаднаразова дапускаў ухвальныя выказванні ў бок узброенай агрэсіі. РПЦ у РФ штодня моліцца аб“перамозе”.
З пачатку восені 2020 года па 28 красавіка 2025-га, Паводле дадзеных ініцыятывы “Хрысціянская візія“, з рэпрэсіямі ў Беларусі ў той ці іншай форме сутыкнулася 89 хрысціянскіх служыцеляў: рымска-каталіцкага касцёла — 34, евангельскіх цэркваў — 30, праваслаўнай царквы — 20, грэка-каталіцкай — пяць.
