Швецыя была і застаецца сапраўдным сябрам беларусаў — Ціханоўская
Стакгольм
6 чэрвеня, Позірк. Швецыя “была і застаецца сапраўдным сябрам беларусаў”, заявіла дэмакратычны лідар Святлана Ціханоўская, віншуючы 6 чэрвеня гэтую скандынаўскую дзяржаву з Нацыянальным днём.
На сваёй старонцы ў сацыяльнай сетцы Х палітык назвала Швецыю “надзейным партнёрам” у імкненні беларусаў “да свабоды і дэмакратыі”.
“Мы высока цэнім вашу салідарнасць і сяброўства”, — падкрэсліла Ціханоўская.
Раней у гэты дзень Аляксандр Лукашэнка выказаў спадзеў на тое, што “досвед ранейшага нейтралітэту Швецыі” дапаможа кіраўніцтву гэтай краіны вярнуцца да “раўнапраўнага і паважлівага дыялогу, да аднаўлення якога Беларусь заўсёды гатовая”.
На палях “Форуму Касцюшкі” сёлета 4 лютага ў Гданьску (Польшча) Ціханоўская і яе намеснік у Аб’яднаным пераходным кабінеце (АПК), кіраўнік Народнага антыкрызіснага ўпраўлення Павел Латушка абмяркоўвалі са шведскім міністрам па справах ЕС Есікай Русенкранц пытанні прыцягнення рэжыму Лукашэнкі да адказнасці.
Прэс-служба АПК сцвярджала, што бакі “дамовіліся аб правядзенні прававых кансультацый для абмеркавання ўсіх магчымых міжнародных інструментаў, якія садзейнічаюць прыцягненню да адказнасці Лукашэнкі і яго акружэння”.
