Кіраўнік Мінсельгасхарча: У 2025 годзе плануецца вырасціць больш за 1 млн тон бульбы — частка будзе прададзена ў РФ

3 чэрвеня, Позірк. Беларусь “цалкам закрывае сваю патрэбу ў бульбе і гатовая экспартаваць неабходныя аб’ёмы” ў Расію, заявіў міністр сельскай гаспадаркі і харчавання Юрый Горлаў 3 чэрвеня на палях міжнароднай спецыялізаванай выставы “Белагра-2025”.

Ён “прызнаў рост патрэбы ў прадукце на рынку”, адзначае ТАСС.

Паводле слоў Горлава, сёлета ў Беларусі плануецца вырасціць больш за 1 млн тон бульбы, якой “хопіць і для ўнутранага спажывання — патрэба краіны складае 90 тыс. тон, і для рэалізацыі ў Расіі”.

Кіраўнік Мінсельгасхарчу заявіў, што на беларускіх палях “высаджана маладая бульба”, якая “цалкам закрывае патрэбу ў летнія месяцы”.

У 2024 годзе Беларусь вырасціла 780 тыс. тон бульбы, дадаў міністр.

Кажучы пра долю імпартнай бульбы на паліцах, Горлаў адзначыў, што гэта “абсалютна нязначны працэнт”.

30 траўня намеснік міністра сельскай гаспадаркі і харчавання Уладзімір Гракун на прэс-канферэнцыі ў Мінску заявіў, што насельніцтва Беларусі “будзе забяспечана бульбай”, а лішкі будуць рэалізаваныя за межы краіны, у першую чаргу ў Расію.

Дапамагчы Расіі з бульбай даручыў 28 траўня Аляксандр Лукашэнка, прымаючы з дакладам старшыню Брэсцкага аблвыканкама Пятра Пархомчыка.

27 траўня ўрад Беларусі скасаваў забарону на ўвоз бульбы з дзяржаў Еўрасаюза і іншых “недружалюбных краін”. Пры гэтым было заяўлена, што рашэнне з’яўляецца “адказам на чарговыя санкцыі ЕС”.

8 траўня Лукашэнка прызнаў дэфіцыт бульбы ў краіне, прапанаваўшы беларусам “адмучыцца” без гэтага прадукту яшчэ месяц.

Згодна з данымі Федэральнай службы па ветэрынарным і фітасанітарным наглядзе (Расельгаснагляд), пастаўкі бульбы з Беларусі ў Расію з пачатку 2025 года скараціліся ўдвая ў параўнанні з аналагічным перыядам мінулага года (з 63,9 тыс. да 32 тыс. т).

За ўвесь 2024 год беларускія пастаўшчыкі завезлі ў РФ 201,2 тыс. т бульбы — у 1,6 раза больш, чым у 2023-м.

Валавы збор бульбы ў 2024 годзе склаў 3.110,9 тыс. тон — на 22,6% менш, чым у 2023-м (4.020,8 тыс.), вынікае з праведзенага “Позіркам” аналізу даных Нацыянальнага статыстычнага камітэта.

Ураджай сельскагаспадарчых арганізацый скараціўся на 42% (з 579,3 тыс. да 336 тыс.), сялянскіх (фермерскіх) гаспадарак — на 29,2% (з 596,7 тыс. да 422,4 тыс.), гаспадарак насельніцтва — на 17,3% (з 2.844,9 тыс. да 2.352,5 тыс.).