Намеснікамі кіраўніка Нацбанка прызначаныя Картун з Мінэканомікі і Скабялка з апарата Савета міністраў

22 траўня, Позірк. Намеснікамі старшыні праўлення Нацыянальнага банка прызначаныя Андрэй Картун і Дзяніс Скабялка. Адпаведнае рашэнне 22 траўня прыняў Аляксандр Лукашэнка, паведамляе яго прэс-служба.

Дагэтуль Картун займаў пасаду першага намесніка міністра эканомікі, Скабялка — намесніка кіраўніка апарата Савета міністраў.

Намеснікам кіраўніка справамі прэзідэнта стаў Мікалай Шарстнёў, які займаў пасаду старшыні Беларускай федэрацыі футбола, а да таго — старшыні Віцебскага аблвыканкама.

Амбасадар Беларусі пры Святым Пасадзе Юрый Амбразевіч (з 27 сакавіка) дадаткова атрымаў пасты амбасадара пры Суверэнным ваенным ордэне Гаспітальераў святога Іаана Іерусалімскага, Радоса і Мальты, пастаяннага прадстаўніка пры Харчовай і сельскагаспадарчай арганізацыі ААН і іншых міжнародных арганізацыях у Рыме, а таксама пастаяннага прадстаўніка пры ЮНЕСКО. Раней Амбразевіч быў намеснікам міністра замежных спраў.

Паводле рашэння Лукашэнкі, старшынёй Полацкага райвыканкама стаў Васіль Шылаў, Верхнядзвінскага — Віталь Лаўрынаў, Мёрскага — Аляксандр Ярахновіч, Шаркаўшчынскага — Сяргей Кашміла, Чэрыкаўскага — Аляксей Жарнасекаў; Бабруйскага гарвыканкама — Максім Гурын.

Алена Пруднікава-Кірпічонак прызначаная намесніцай старшыні Магілёўскага аблвыканкама па пытаннях эканомікі, Эдуард Тамільчык — кіраўніком адміністрацыі Кастрычніцкага раёна Мінска.

Алег Панасюк узначаліў ААТ “Керамін”.

Ігар Яцкевіч прызначаны рэктарам Беларускай дзяржаўнай акадэміі авіяцыі.

Намесніцай міністра антыманапольнага рэгулявання і гандлю стала Святлана Караткевіч, першым намеснікам міністра лясной гаспадаркі — Андрэй Карась, намеснікам міністра лясной гаспадаркі — Ігар Малашэвіч, намеснікамі міністра энергетыкі — Уладзіслаў Доўгі і Канстанцін Аношанка.

Вадзім Шапялевіч прызначаны кіраўніком Фонда сацыяльнай абароны насельніцтва Міністэрства працы і сацыяльнай абароны.