У 17-ы пакет санкцый ЕС супраць Расіі ўключаны Мінскі завод колавых цягачоў

20 траўня, Позірк. ААТ “Мінскі завод колавых цягачоў” (МЗКЦ) уключанае ў зацверджаны 20 траўня Саветам ЕС 17-ы пакет санкцый супраць Расіі ў сувязі з агрэсіяй ва Украіне, вынікае з дакумента, апублікаванага ў Афіцыйным часопісе Еўрапейскага саюза.

У абгрунтаванні гаворыцца, што “Мінскі завод колавых цягачоў — беларускае вайскова-прамысловае прадпрыемства, якое распрацоўвае вайсковую тэхніку для Узброеных сіл РФ і падтрымлівае абараназдольнасць Расіі”.

“Толькі ў 2024 годзе агульны аб’ём экспарту прадпрыемства склаў 306 вагонаў вайсковай тэхнікі, у асноўным пастаўленых расійскім прадпрыемствам, якія ўваходзяць у вайскова-прамысловы комплекс Расійскай Федэрацыі. У 2025 годзе прадпрыемства працягнула экспарт вайсковай тэхнікі ў Расійскую Федэрацыю”, — адзначана ў дакуменце.

Такім чынам, гаворыцца ў абгрунтаванні, МЗКЦ “аказвае матэрыяльную падтрымку вайскова-прамысловаму комплексу Расіі і ўраду Расійскай Федэрацыі, які нясе адказнасць за анэксію Крыма і дэстабілізацыю сітуацыі ва Украіне”.

ААТ “МЗКЦ” спецыялізуецца на вытворчасці вялікагрузных колавых транспартных сродкаў высокай праходнасці. Прадпрыемства ўжо знаходзіцца пад санкцыямі ЕС са снежня 2020 года, прынятымі за парушэнні правоў чалавека ў Беларусі.