Абвешчаны чарговы прызыў афіцэраў запасу

5 траўня, Позірк. Указ № 179 “Аб прызыве афіцэраў запасу на вайсковую службу” падпісаў 5 траўня Аляксандр Лукашэнка, паведаміла ягоная прэс-служба.

У 2025 годзе прадугледжваецца прызваць ва Узброеныя сілы і органы пагранічнай службы мужчын ва ўзросце да 27 гадоў з ліку афіцэраў запасу, якія не прайшлі тэрміновую ваенную службу, службу ў рэзерве і не маюць права на адтэрміноўку ад прызыву.

Паведамляецца, што падобны заклік праводзяцца штогод на планавай аснове, а рэалізацыя ўказа “дасць магчымасць павысіць узровень укамплектаванасці першасных воінскіх пасад афіцэрскага складу і забяспечыць падрыхтоўку мабілізацыйнага рэзерву“.

Тэкст дакумента не прыводзіцца.

Летась Лукашэнка падпісаў аналагічны ўказ 29 красавіка. Тады Міністэрству абароны і Дзяржаўнаму пагранічнаму камітэту было даручана прызначыць афіцэраў запасу на воінскія пасады, даць ім доступ да дзяржсакрэтаў “у парадку, вызначаным актамі заканадаўства для ваеннаабавязаных, якія прызываюцца на ваенныя (спецыяльныя) зборы, ваенную службу па мабілізацыі“.

Лімітавая колькасць афіцэраў, якія прызываюцца, з 2024 года аднесеная да інфармацыі “для службовага карыстання“.

Аналагічны ўказ ад 10 сакавіка 2023 года прадугледжваў прызыў да 230 чалавек ва УС і да 20 чалавек у органы памежнай службы (да таго прызыў праводзіўся толькі ва УС).

Цяперашні прызыў стане дванаццатым. Упершыню падобны ўказ быў падпісаны ў 2002 годзе (260 чалавек), затым — у 2005-м (да 200), пасля чаго была дзесяцігадовая паўза. У 2016-2021 гадах прызывалася да 100 чалавек.

У 2022 годзе гэтая колькасць была павялічаная ў 1,5 раза — да 150, а сам указ быў падпісаны ў дзень уварвання расійскіх войскаў ва Украіну — 24 лютага. Тады падкрэслівалася, што прызыў “не звязаны са становішчам у рэгіёне”.