МАРГ выявіў парушэнні ва ўсіх правераных крамах касметыкі сеткі “Летуаль”

7 красавіка, Позірк. Парушэнні заканадаўства аб гандлі і абароне правоў спажыўцоў выяўленыя ва ўсіх правераных касметычных крамах касметыкі сеткі “Летуаль”, якая належыць ТАА “ЖэнціТрэйд”, паведамляе прэс-служба Міністэрства антыманапольнага рэгулявання і гандлю (МАРГ).

У Гомелі ў крамах сеткі адсутнічаў абавязковы пералік тавараў для рэалізацыі, удакладняе ведамства, у Мінску з продажу канфіскаваная касметычная прадукцыя (сонцаахоўныя крэмы) з мінулымі тэрмінамі прыдатнасці на суму звыш 2,2 тыс. рублёў. Пры гэтым, як адзначаецца, тэрмін прыдатнасці некаторых сродкаў касметыкі скончыўся яшчэ ў жніўні і кастрычніку 2024 года.

ТАА “ЖэнціТрэйд” загадана ліквідаваць парушэнні да 15 красавіка 2025 года.

Таксама паведамляецца, што ў краме “Суседзі” ў Гомелі кантралёры знялі з рэалізацыі каля 400 штук пратэрмінаваных яек, выявіўшы і іншыя парушэнні правілаў гандлю.

У аграгарадку Аброва (Брэсцкая вобласць) у гандлёвым аб’екце Івацэвіцкага райспажыўтаварыства (Брэсцкая вобласць) кантралёры знялі з рэалізацыі больш за 40 найменняў тавараў з мінулымі тэрмінамі прыдатнасці: (безалкагольныя напоі — 84 штукі; мясныя прадукты — 18,7 кг; малочныя прадукты — 1,030 кг; кандытарскія вырабы — 23 адзінкі; іншыя бакалейныя тавары — 42 адзінкі).

На некаторыя тавары (крэкер, прадукт са свініны, напоі безалкагольныя, нектар) тэрмін прыдатнасці скончыўся больш за тры месяцы таму, на асобныя (шакалад) — больш за паўгода таму. Агульны кошт прапанаваных да рэалізацыі тавараў з мінулымі тэрмінамі прыдатнасці склаў 594,44 рублёў.

“Па дадзеных фактах ўсім гаспадарчым суб’ектам накіраваныя рэкамендацыі па ліквідацыі парушэнняў і выдадзеныя прадпісанні аб забароне продажу прадукцыі са скончаным тэрмінам прыдатнасці”, — гаворыцца ў паведамленні.

Падкрэсліваецца, што праверкі праведзеныя пасля звароту пакупнікоў на гарачую лінію МАРГ.

4 красавіка паведамлялася, што ва ўсіх правераных крамах рознічнай сеткі “7 пятніц” (належыць ТАА “Юністар груп”) выяўленыя парушэнні заканадаўства аб гандлі і абароне правоў спажыўцоў.

10 сакавіка МАРГ паведаміў, што парушэнні правілаў гандлю ўстаноўленыя амаль у кожнай трэцяй праверанай краме сеткі “Табакерка”, якая належыць СЗАТ “ЭНЕРГА-ОЙЛ”.

28 лютага МАРГ праінфармаваў пра парушэнні правілаў гандлю, выяўленых ва ўсіх правераных крамах сеткі “Хіт!”, якая належыць ТАА “Еўрагандль”.

20 лютага ведамства ўказала на парушэнні ў 96% гандлёвых аб’ектаў рознічнай сеткі “Капеечка”.

Раней МАРГ выставіў маштабныя прэтэнзіі да інтэрнэт-пляцоўкі “Вайлдберыз” і гандлёвай сеткі “Суседзі”.

14 студзеня ведамства ўзначаліў былы дыпламатычны работнік і былы першы намеснік міністра гандлю Артур Карповіч.