У першым квартале фізасобы прадалі валюты амаль на 50 млн долараў больш, чым набылі

4 красавіка, Позірк. У студзені — сакавіку 2025 года насельніцтва Беларусі выступіла чыстым прадаўцом замежнай валюты, сведчаць даныя Нацыянальнага банка.

Фізічныя асобы набылі замежнай валюты на 2 млрд 963,7 млн долараў (тут і далей у эквіваленце), прадалі — на 3 млрд 12,5 млн (адмоўнае сальда — 48,9 млн).

Наяўнай валюты набыта на 1 млрд 926,7 млн, прададзена — на 2 млрд 350,9 млн (-424,2 млн), безнаяўнай — на 1 млрд 36,9 млн і 661,6 млн адпаведна (+375,3 млн).

У 2024 годзе фізічныя асобы набылі замежнай валюты на 11 млрд 73,5 млн долараў, прадалі — на 12 млрд 770,1 млн (адмоўнае сальда — 1 млрд 696,6 млн). Наяўнай валюты набыта на 7 млрд 443,9 млн, прададзена — на 10 млрд 109,8 млн (-2 млрд 665,8 млн), безнаяўнай — на 3 млрд 629,6 млн і 2 млрд 660,3 млн адпаведна (+969,2 млн).

На 10,25% (з 3,4735 да 3,1176 рубля) знізіўся афіцыйны курс долара ў Беларусі за першы квартал гэтага года. Гэта другі паказчык на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў на 31 снежня 2024 года і 31 сакавіка 2025-га (па выніках студзеня і студзеня — лютага таксама другое месца, -1,73% і -8,54% адпаведна).

Аналіз таксама паказаў, што афіцыйны курс долара ў Беларусі ў 2024 годзе вырас на 9,32% (з 3,1775 да 3,4735 рубля). Гэта чацвёрты паказчык на тэрыторыі былога СССР.

У 2023 годзе Беларусь займала другое месца па росце афіцыйнага курса долара (+16,12%), у 2022-м — трэцяе (+7,39%), у 2021-м — чацвёртае сярод краін былога СССР, дзе долар патаннеў (-1,19%), у 2020-м — першае месца па яго падаражанні (+22,59%).