Беларусь і М’янма “значна актывізуюць кантакты” ў вайсковай сферы — прадстаўнік Мінабароны

29 сакавіка, Позірк. Усе запланаваныя перагаворы міністра абароны Віктара Хрэніна ў рамках візіту ў М’янму адбыліся, паведаміў 29 сакавіка памочнік чыноўніка па пытаннях міжнароднай вайсковай супрацы (МВС), начальнік дэпартамента МВС Валерый Равенка.

“Вынікам стане значная актывізацыя кантактаў у вайсковай сферы па пытаннях адукацыі, абмену досведам у падрыхтоўцы войскаў, пабудовы шэрагу сістэм забеспячэння”, — напісаў ён на сваёй старонцы ў сацыяльнай сетцы Х.

Як паведамляў “Позірк”, па выніках перагавораў 28 сакавіка ў Нейп’іда Хрэнін і яго м’янманскі калега Маунг Маўнг Эй падпісалі пратакол, які пацвярджае намеры дзвюх краін умацаваць вайсковую супрацу.

Беларуская вайсковая дэлегацыя на чале з Хрэніным прыбыла ў М’янму 27 сакавіка. На другі дзень візіту ў гэтай краіне ў Паўднёва-Усходняй Азіі адбыўся моцны землятрус, які прывёў да маштабных разбурэнняў і гібелі больш як 1 тыс. чалавек.

Падземныя штуршкі адчуваліся ў суседніх краінах, у тым ліку ў Тайландзе. У сталіцы краіны Бангкоку абрынулася некалькі вышынных будынкаў. Загінула не менш за дзесяць чалавек, паўтара дзясятка апынулася пад заваламі.