27 сакавіка, Позірк. Урад Польшчы з 27 сакавіка абмежаваў права мігрантаў прасіць аб наданні міжнароднай абароны на мяжы з Беларуссю, вынікае з заявы міністра ўнутраных спраў і адміністрацыі, каардынатара спецыяльных службаў Томаша Сямоняка.
Напярэдадні прэзідэнт Польшчы Андрэй Дуда падпісаў закон, які дазваляе не прымаць заявы аб наданні міжнароднай абароны на асобных участках мяжы, якія вызначае ўрад. Парламент падтрымаў гэты дакумент напрыканцы лютага.
Сямоняк напісаў на сваёй старонцы ў сацыяльнай сетцы Х, што адпаведная пастанова “дае супрацоўнікам Памежнай аховы адзін з ключавых інструментаў для барацьбы з нелегальнай міграцыяй, якая з’яўляецца элементам гібрыднай агрэсіі супраць Польшчы, а таксама для спынення міжнароднай злачыннасці”.
Згодна з фотакопіяй дакумента, якую апублікаваў Сямоняк, абмежаванне будзе дзейнічаць 60 дзён. Разам з тым, як паведамляе агенцтва РАР, гэты тэрмін можа быць падоўжаны са згоды парламента.
Паводле інфармацыі медыя, памежнае ведамства, нягледзячы на абмежаванні, будзе прымаць заявы аб наданні міжнароднай абароны ад непаўналетніх без суправаджэння дарослых, цяжарных жанчын, а таксама асоб, якім “можа спатрэбіцца асаблівае абыходжанне, асабліва ў сувязі з іх узростам або станам здароўя”.
Абмежаванні таксама не тычацца асоб, якім, на думку Памежнай аховы, пагражае “рэальная рызыка прычынення сур’ёзнай шкоды” ў краіне, з якой тыя прыбылі ў Польшчу.
Паводле інфармацыі канцылярыя прэм’ер-міністра Дональда Туска, рашэнне скіраванае на “прадухіленне дэстабілізацыі ўнутранай сітуацыі” на тэрыторыі Польшчы: “На працягу некалькіх гадоў Беларусь праводзіць арганізаваную аперацыю, скіраваную на парушэнне грамадскага парадку ў нашай краіне, а таксама ў іншых краінах ЕС. Вынікам гэтай аперацыі з’яўляецца рэзкае павелічэнне колькасці незаконных перасячэнняў польска-беларускай мяжы”.
Раней грамадскія арганізацыі, якія займаюцца дапамогай уцекачам, выступілі супраць палажэнняў, якія прадугледжваюць магчымасць увядзення часовага абмежавання. На мінулым тыдні яны накіравалі прэзідэнту Анджэю Дуду зварот з просьбай накласці вета на папраўку да закону па гэтым пытанні.
Польшча дасягнула “98% эфектыўнасці затрыманняў” нелегальных мігрантаў, якія імкнуцца перасячы мяжу з беларускай тэрыторыі, заявіў Туск 22 сакавіка ў рамках сустрэчы з прадстаўнікамі сілавых структур у падраздзяленні Памежнай аховы ў горадзе Крынкі (мяжуе з Бераставіцкім раёнам Гродзенскай вобласці).
Міграцыйны крызіс на мяжы Беларусі і краін Еўрасаюза цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Ад пачатку 2025 года суседнія дзяржавы ЕС спынілі сама меней 3,2 тыс. спробаў нелегальнага пранікнення з беларускай тэрыторыі, сведчыць праведзены “Позіркам” параўнальны аналіз аператыўных даных іх памежных службаў. Больш за ўсё зафіксавала Польшча — каля 2,7 тыс.
За 2024 год Літва, Латвія і Польшча прадухілілі 36,3 тыс. спробаў незаконнага пранікнення мігрантаў з беларускай тэрыторыі.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды “паклікалі”.
