Лукашэнка абмеркаваў з султанам Амана “перспектывы развіцця адносін”

15 снежня, Позірк. “Стан і перспектывы развіцця адносін” абмеркавалі 15 снежня ў Маскаце Аляксандр Лукашэнка і султан Амана Хайсам бен Тарэк аль Саід.

Як паведамляе прэс-служба Лукашэнкі, абмеркаваныя былі таксама “напрамкі, па якіх можна надаць дадатковы імпульс двухбаковаму супрацоўніцтву”.

Акрамя гэтага, як заяўляецца, перагаворшчыкі “абмяняліся думкамі па актуальным міжнародным парадку дня”.

“Перамовы лідары краін правялі ў пашыраным складзе з удзелам членаў дэлегацый. Затым прайшла сустрэча ў фармаце “сам-насам”, — гаворыцца ў рэлізе.

Аманскае інфармагенцтва ONA паведаміла, што бакі абмеркавалі “ўмацаванне супрацоўніцтва і партнёрства ў розных эканамічных галінах, інвестыцыйнай, тэхналагічнай і медыцынскай сферах”.

Напярэдадні паведамлялася, што Лукашэнка правядзе ў Амане некалькі дзён. Разам з ім у гэтую краіну прыбылі яго старэйшы сын Віктар Лукашэнка, які ўзначальвае Нацыянальны алімпійскі камітэт, а таксама міністр замежных спраў Максім Рыжанкоў, міністр прамысловасці Аляксандр Яфімаў, міністр сельскай гаспадаркі і харчавання Анатоль Ліневіч і амбасадар Беларусі ў Егіпце (па сумяшчальніцтве ў Судане і Амане) Сяргей Цярэнцьеў.

Раней прэс-служба Лукашэнкі паведаміла, што на перамовах з султанам Амана плануецца абмеркаваць “стан і перспектывы развіцця адносін, напрамкі, па якіх можна надаць дадатковы імпульс двухбаковаму супрацоўніцтву”, а таксама абмяняцца думкамі па “актуальным міжнародным парадку дня”.

“Асноўная ўвага ў ходзе візіту будзе нададзена пытанням гандлёва-эканамічнага ўзаемадзеяння, — гаварылася ў паведамленні. — Размова аб пашырэнні тавараабароту, развіцці супрацоўніцтва ў прамысловасці і сельскай гаспадарцы і па іншых напрамках, якія ўяўляюць узаемную цікавасць”.

Паводле даных Міністэрства замежных спраў, у 2021 годзе тавараабарот паміж Беларуссю і Аманам складаў 1,5 млн долараў (беларускі экспарт — 0,9 млн). У аснове паставак з Беларусі тады ляжалі калійныя ўгнаенні і прадукты харчавання. Актуальнай інфармацыі на сайце МЗС не прадстаўлена.