31 кастрычніка, Позірк. Вылучэнне ў прэзідэнты сямі прыхільнікаў дзейнай улады прадыктавана жаданнем яго “засцерагчы”, заявіў Аляксандр Лукашэнка ў інтэрв’ю дзяржаўнаму “Першаму інфармацыйнаму” каналу.
“Гэта найважнейшая тэма сёння. Я спрабую зараз глядзець на гэтую праблему, думаю, што за гэтым стаіць. Супраць жаночага прэзідэнта жанчыны паставілі сваю альтэрнатыву, самы аракул і вяшчальнік палітыкі прэзідэнта таксама выступіў — Гайдукевіч, Партыя працы і справядлівасці свайго вылучыла, і іншыя”, — сказаў Лукашэнка.
На пытанне, як ён ацэньвае такую актыўнасць, Лукашэнка адказаў, што прэтэндэнтам у прэзідэнты “адысці ад сваёй палітыкі будзе складана”.
“Але, тым не менш, альтэрнатыўныя кандыдаты. Я думаю, яны проста хочуць дзейнага прэзідэнта засцерагчы. Ну а як інакш я магу расцаніць, асабліва вылучэнне жанчынамі, сваіх кандыдатураў? Я ўпэўнены, што яны проста жадаюць мяне тут атачыць флангамі, засцерагчы, не больш, не менш. Ну, мне хацелася б так”, — дадаў ён.
Адказваючы на пытанне, ці ў небяспецы ён, Лукашэнка сказаў: “Ды не, вы не хвалюйцеся. Мы з вамі прайшлі такое бурнае жыццё, на барыкадах стаялі плячом да пляча. Якая небяспека? Можа, яна недзе і ёсць, але мы пакуль яе не знайшлі”.
31 кастрычніка Цэнтральная выбарчая камісія зарэгістравала ініцыятыўныя групы грамадзян па зборы подпісаў выбаршчыкаў у падтрымку вылучэння Алега Гайдукевіча (старшыня праўладнай Ліберальна-дэмакратычнай партыі, дэпутат Палаты прадстаўнікоў), Аляксандра Хіжняка (старшыня праўладнай Рэспубліканскай партыі працы і справядлівасці) і Вольгі Чамаданавай (МУС, цяпер начальнік галоўнага ўпраўлення ідэалагічнай працы і па справах моладзі Мінгарвыканкама) кандыдатамі ў прэзідэнты.
У панядзелак, 4 лістапада, ЦВК разгледзіць дакументы яшчэ чатырох прэтэндэнтаў. 31 кастрычніка дакументы ў ЦВК падалі экс-кандыдат у прэзідэнты на выбарах 2020 года Ганна Канапацкая, а таксама адстаўны генерал, кіраўнік праўладнага Беларускага саюза афіцэраў Сяргей Бобрыкаў, прадпрымальніца Дзіяна Кавалёва і першы сакратар ЦК Камуністычнай партыі Сяргей Сыранкоў.
29 кастрычніка ЦВК зарэгістравала ініцыятыўную групу па зборы подпісаў за Лукашэнку. На паседжанні таксама былі разгледжаныя заяўкі на рэгістрацыю ініцыятыўных груп Аляксандра Драздова (публічных звестак аб ім няма) і лідара апазіцыйнага Руху “За Свабоду” (у Беларусі ліквідаваны, працягнуў дзейнасць у выгнанні) Юрыя Губарэвіча. Абедзве аднагалосна адхіленыя.
Прэзідэнцкія выбары прызначаны на 26 студзеня 2025 года. Тэрмін рэгістрацыі ініцыятыўных груп заканчваецца 1 лістапада. Збор подпісаў пачынаецца 7 лістапада.
Аўтарызавацца
Забыліся пароль?
Выхад з профілю
