Праз недахоп самалётаў “Белавія” прыпыніла рэйсы з Брэста і Гомеля ў РФ
29 кастрычніка, Позірк. Аб прыпыненні “па тэхнічных прычынах” выканання рэйсаў нацыянальнага перавозчыка “Белавія” з Брэста і Гомеля ў Маскву і Санкт-Пецярбург паведамляе тэлеграм-канал “АдВінта. Авіяцыя Беларусі”.
Адзначаецца, што 28 кастрычніка былі адмененыя рэйсы з Гомеля і Брэста ў Маскву, якія значыліся ў раскладзе, 29 кастрычніка — з Гомеля ў Санкт-Пецярбург і Маскву.
“Белавія” сітуацыю пакуль не каментуе.
Як адзначаюць крыніцы тэлеграм-канала, прычына скасавання рэйсаў у “недахопе бартоў праз тэхабслугоўванне”.
Са спасылкай на звесткі авіясэрвісаў Flightradar24 і Planespotters сцвярджаецца, што два самалёты авіякампаніі (“Эмбраер” і “Боінг”) цяпер праходзяць тэхабслугоўванне.
“Яшчэ адзін “Эмбраер” задзейнічаны на выязную серыю хакейнага клуба” Дынама-Мінск” [у Кантынентальнай хакейнай лізе]”, — гаворыцца ў паведамленні.
Да таго ж, звяртае ўвагу тэлеграм-канал, “на гэтым тыдні ў раскладзе кампаніі значацца адразу два рэйсы ў Наябрск (Ямала-Ненецкая аўтаномная акруга РФ) за вахтавікамі”. “Ну і не будзем забываць пра павялічаную з учорашняга дня частату рэйсаў з Мінска ў Баку і Дубай”, — адзначаецца ў публікацыі.
Чакаецца, што палёты з беларускіх абласных цэнтраў адновяцца 4 лістапада.
27 кастрычніка паведамлялася, што “Белавія” абвясціла аб пераходзе на зімовы расклад і павелічэнні колькасці рэйсаў па некалькіх напрамках.
Згодна з абноўленым раскладам, штодзённымі стануць рэйсы з Мінска ў Баку (Азербайджан) і Дубай (ААЭ) — да гэтага было пяць і тры разы на тыдзень адпаведна.
Двойчы на тыдзень (замест аднаго) будзе ажыццяўляцца з 23 лістапада пералёт па маршруце Мінск — Туркменбашы (Туркменістан).
Таксама павялічаная частата палётаў у Маскву (РФ) з Брэста і Гомеля — да чатырох (тры) і сямі (пяць) разоў на тыдзень адпаведна.
Зімовы расклад будзе дзейнічаць па 29 сакавіка 2025 года. Авіякампаніі усяго свету ўжываюць сістэму сезоннага раскладу для ўдасканалення палётаў на працягу года.
Авіякампаніі “Белавія” забаронена лятаць у краіны Еўрасаюза пасля інцыдэнту 23 траўня 2021 года, калі ў выніку дзеянняў беларускіх уладаў у мінскім аэрапорце здзейсніў вымушаную пасадку самалёт ірландскай авіякампаніі Ryanair, які ляцеў з Афін у Вільнюс. На борце былі на той момант апазіцыйны блогер Раман Пратасевіч і яго сяброўка, расіянка Сафія Сапега. Яны былі затрыманыя, асуджаныя, але пасля памілаваныя.
2 сакавіка 2022 года, неўзабаве пасля поўнамаштабнага ўварвання Расіі ва Украіну, ЗША ўвялі ў дачыненні да “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. 7 снежня 2023 года яны былі падоўжаныя яшчэ на 180 дзён.
9 жніўня 2023 года “Белавія” трапіла ў санкцыйны спіс ЗША.
3 лістапада 2023 года генеральны дырэктар авіякампаніі Ігар Чаргінец прызнаў, што планы па мадэрнізацыі флота самалётаў авіякампаніі “Белавія” былі парушаны праз увядзенне заходніх санкцый.
