Лукашэнка: Беларусь не давала РФ тэрыторыю для нападу на Украіну, гэта Пуцін завярнуў войскі на Кіеў

24 кастрычніка, Позірк. Беларусь не давала Расіі тэрыторыю для “заходу ва Украіну”, заявіў Аляксандр Лукашэнка 23 кастрычніка ў інтэрв’ю BBC.

“У нас [у лютым 2022 года] былі вучэнні, на якіх было задзейнічана некалькі тысяч чалавек расійскіх войскаў. Гэтыя войскі былі ў асноўным з Усходняй акругі, і [прэзідэнт РФ Уладзімір] Пуцін пачаў выводзіць гэтыя войскі з Беларусі. Яны былі на поўдні [Беларусі], і па гэтай дарозе, міма мяжы з Украінай, ён пачаў вывад войскаў”, — цытуе Лукашэнку яго прэс-служба.

“Частку войскаў у нейкі перыяд (справакавалі, я ў гэтым перакананы) ён (Пуцін. — “Позірк”.) завярнуў на Кіеў. Чаму так адбылося? Спытайце ў Зяленскага”, — дадаў Лукашэнка.

24 лютага 2022 года Расія пачала поўнамаштабную вайсковую агрэсію супраць Украіны, якая была падтрыманая ўладамі ў Мінску. З пачатку ўварвання, а таксама ў асобныя перыяды пазней, тэрыторыя Беларусі актыўна выкарыстоўвалася расійскай арміяй для нанясення ўдараў па Украіне.

21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Лукашэнка прызнаў, што з Беларусі ва Украіну была ўведзеная 20-тысячная групоўка расійскіх войскаў. Пасля паўночныя тэрыторыі былі вызваленыя.

“Расіяне наносілі ўдар сваімі ракетамі, па-мойму, “Іскандэрамі”, я не памятаю, для таго каб засцерагчы свае падраздзяленні. І тады яны ўвялі 20 тыс. сваіх хлопцаў, войскаў, з тэрыторыі Беларусі, якія былі на вучэннях. Гэта Усходняя акруга. Нават не Заходняя. Гэта вунь з Іркуцка і Далёкага Усходу ўзброеныя сілы былі. І яны вымушаныя былі іх увесці туды. Вось чаму з нашай тэрыторыі”, — сказаў Лукашэнка.

“Але гэта не значыць, яшчэ раз кажу, што я апраўдваюся, — заявіў ён. — Я падтрымліваю Расію ў тым, што яны вас (НАТО. — “Позірк”.) апярэдзілі. Калі б вайскоўцы Расіі прамаргалі гэты момант, яны вымушаныя былі б сустрэць масіраваны ўдар з боку войскаў НАТО — не Украіны. Цяпер не Украіна ваюе. Цяпер вы там ваюеце. Вашы найміты і ваша зброя. Дык вы ж яшчэ большыя агрэсары, чым я… Вы большыя агрэсары, натаўцы, чым Беларусь”.

11 красавіка 2023 года першы намеснік міністра абароны Украіны Аляксандр Паўлюк заявіў, што ў пачатку вайны 70 тыс. вайскоўцаў 35-й агульнавайсковай арміі РФ на 7 тыс. бронемашынах “з беларускай мяжы ўварваліся” на тэрыторыю Кіеўскай вобласці.