25 верасня, Позірк. Урад Літвы ўхваліў падрыхтаваныя Міністэрствам фінансаў праекты прававых актаў аб дэнансацыі пагадненняў аб мытным супрацоўніцтве з Беларуссю і Расіяй.
Пра гэта паведамляецца ў прэс-рэлізе літоўскага ўрада.
“Улічваючы беспрэцэдэнтную ваенную агрэсію Расіі і яе памагатага Беларусі супраць Украіны і грубае парушэнне міжнароднага права, а таксама той факт, што на практыцы трансгранічнае гандлёва-эканамічнае супрацоўніцтва з гэтымі дзяржавамі-агрэсарамі цалкам прыпынена і немагчыма, прынята рашэнне дэнансаваць пагадненні”, — заявіла кіраўнік Мінфіна Гінтарэ Скайстэ.
З пачатку ваеннай агрэсіі Расіі супраць Украіны літоўская мытня практычна не ажыццяўляла ніякага супрацоўніцтва з беларускімі і расійскімі службамі і не ажыццяўляла ніякага абмену інфармацыяй, гаворыцца ў паведамленні.
Адзначаецца таксама, што двухбаковыя пагадненні аб супрацоўніцтве і ўзаемнай дапамозе ў сферы мытнай дзейнасці, якія ўрад заключыў яшчэ да ўступлення Літвы ў Еўрапейскі саюз, таксама “не маюць вялікага практычнага значэння”, бо такое супрацоўніцтва належыць да выключнай кампетэнцыі ЕС.
Згодна з законапраектам, кожны з бакоў можа спыніць дзеянне пагадненняў, накіраваўшы другому боку ноту па дыпламатычных каналах. У такіх выпадках дзеянне пагадненняў мінае праз шэсць месяцаў пасля атрымання іншым бокам такога паведамлення, удакладнілі ў прэс-службе ўрада.
16 верасня паведамлялася, што прэзідэнт Літвы Гітанас Наўседа ўнёс у Сейм прапанову аб дэнансацыі трох дамоваў з Расіяй і Беларуссю, якія тычацца эканамічнага супрацоўніцтва.
Наўседа прапанаваў, як і анансавалася, дэнансаваць дагавор аб заахвочванні і абароне інвестыцый, падпісаны ўрадамі Літвы і Беларусі 5 сакавіка 1999 года ў Мінску, аналагічны дагавор з Расіяй, падпісаны 29 чэрвеня 1999 года ў Маскве, і дагавор аб пазбяганні двайнога падаткаабкладання даходаў і капіталу і аб прадухіленні фіскальных парушэнняў, падпісаны з Расіяй у той жа час.
24 верасня Сейм Літвы ўхваліў у першым чытанні дэнансацыю гэтых дамоваў.
