Наўседа мае намер прапанаваць Сейму Літвы дэнансаваць пагадненні з Беларуссю і РФ па інвестыцыях

9 верасня, Позірк. Прэзідэнт Літвы Гітанас Наўседа “ў бліжэйшы час” прадставіць Сейму прапанову дэнансаваць пагадненні з Беларуссю і Расіяй аб заахвочванні і ўзаемнай абароне інвестыцый, паведаміў LRT яго дарадца Рыдас Ясюленіс.

Паводле інфармацыі партала навін Delfi, літоўскі ўрад ухваліў адпаведны крок яшчэ 22 траўня. Разам з тым офіс кіраўніка дзяржавы дагэтуль не ўнёс у парламент прапанову аб дэнансацыі згаданых пагадненняў, хоць вясновая сесія Сейма ішла да 18 ліпеня, пазачарговыя пасяджэнні праводзіліся 13 жніўня і 3 верасня.

Згодна з пакуль яшчэ дзейнымі пагадненнямі, Літва павінна абараняць расійскія і беларускія інвестыцыі ў краіне. У адваротным выпадку кампаніі з Беларусі і РФ могуць звяртацца са скаргамі як у літоўскія суды, гэтак і ў міжнародны арбітраж.

Гэтыя дакументы таксама абавязваюць Вільнюс без абмежаванняў забяспечваць пераводы і рух грошай, звязаных з інвестыцыямі.

Міністэрства замежных спраў Літвы ўнесла пытанне аб дэнансацыі гэтых пагадненняў у праграму восеньскай сесіі Сейма.