Лукашэнка абмеркаваў з прапагандыстамі прэзідэнцкія выбары (дапоўнена)
Адаптаваны загаловак і абзацы 1–2, пашыраны абзац 4, дададзены абзацы 5–7
29 жніўня, Позірк. Даклад пра “актуальныя пытанні інфармацыйнай палітыкі” заслухаў 29 жніўня ў Мінску Аляксандр Лукашэнка, паведамляе яго прэс-служба.
У сустрэчы ўзялі ўдзел намеснік кіраўніка яго адміністрацыі Уладзімір Пярцоў (экс-міністр інфармацыі), кіраўнік Мінінфарма Марат Маркаў, прэс-сакратар Лукашэнкі Наталля Эйсмант і яе муж старшыня Белтэлерадыёкампаніі Іван Эйсмант.
Адно з вынесеных на абмеркаванне пытанняў было звязанае з прэзідэнцкімі выбарамі 2025 года.
“Мы хутка ўступаем у перадвыбарчую кампанію, — заявіў Лукашэнка. — Натуральна, што сродкі масавай інфармацыі, на шчасце, дзякуй богу, будуць гуляць практычна адну з вядучых роляў у гэтай сітуацыі. Я кажу на шчасце, што не іншыя праблемы, войны і іншае. Лепш на гэтым полі будзем ваяваць пакуль і змагацца, хаця не зусім проста гэта”.
Спікер падзякаваў прапагандыстам за тое, што яны бяруць “самыя актуальныя тэмы жыцця” і яго самога ў гэтым кантэксце “часам нядрэнна” паказваюць.
“Але нам трэба будзе ў гэтую перадвыбарчую кампанію паказаць, чаго мы дасягнулі ў гэты час, — сказаў Лукашэнка. — І нам зноў не трэба некага за вушы сюды цягнуць. Ёсць што паказаць людзям. Так, у нас ёсць нямала недахопаў. Ну што рабіць… Ва ўсіх яны ёсць. Але зроблена нямала, і трэба гэта людзям паказаць. А людзі няхай ужо вызначаюць, што ім рабіць і каго выбіраць”.
“Валіць на карысць дзейнага прэзідэнта, калі ён будзе кандыдатам, нам таксама не трэба. Спакойна трэба паказаць тое, што ёсць”, — дадаў ён.
Сёмыя прэзідэнцкія выбары ў Беларусі павінны адбыцца не пазней за 20 ліпеня 2025 года. 14 жніўня аб’яднанне былых сілавікоў BelPol са спасылкай на свае крыніцы паведаміла, што выбары запланаваныя на 23 лютага 2025-га.
Раней дэмакратычныя сілы Беларусі заявілі, што будуць дамагацца іх непрызнання міжнароднай супольнасцю.
