Прадстаўнік Генштаба ў выпадку ўварвання УСУ ў Беларусь спадзяецца на “народнае апалчэнне”
24 жніўня, Позірк. У выпадку ўварвання ў Беларусь Узброеных сіл Украіны будуць задзейнічаны сілы тэрытарыяльнай абароны і “народнага апалчэння”, вынікае з заявы намесніка начальніка Генеральнага штаба Узброеных сіл Віктара Тумара “СБ. Беларусь сегодня” 23 жніўня.
Паводле яго слоў, “калі б здарылася такая сітуацыя ў Беларусі, як у Курскай вобласці”, “далі б магчымасць людзям адстойваць свой дом са зброяй”.
“І проста так дыверсійна-разведвальныя групы ўжо свабодна не перамяшчаліся, і ва ўкраінцаў не было б магчымасці проста так расстрэльваць грамадзянскія аўтамабілі”, — дадаў ён.
Тэрытарыяльныя войскі — род войскаў УС, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.
Згодна з прынятым у 2023 годзе законам “Аб народным апалчэнні”, яго задача заключаецца ў аказанні садзейнічання тэрытарыяльным органам унутраных спраў пры забеспячэнні ваеннага становішча, абароне ўласнасці “ад злачынных і іншых супрацьпраўных замахаў”. Стварэнне ініцыявана Аляксандрам Лукашэнкам. Фармуецца пры кожнай сельскай радзе “на добраахвотнай аснове”.
У Курскай вобласці РФ УСУ вядуць паспяховы наступ з 6 жніўня.