МУС Літвы: Беларусы, якія прыехалі не адразу пасля выбараў 2020 года, правяраюцца вельмі старанна

19 жніўня, Позірк. Беларусы, якія прыехалі ў Літву не адразу пасля выбараў 2020 года, правяраюцца вельмі старанна, заявіў літоўскай тэлерадыёкампаніі LRT намеснік міністра ўнутраных спраў краіны Арнольдас Абрамавічус.

“Тыя, хто хацеў пакінуць краіну (Беларусь. — “Позірк“.), зрабілі гэта адразу пасля выбараў. Усе астатнія правяраюцца вельмі старанна. Мы больш строга правяраем асоб, якія патрабуюць статус уцекача і якія заяўляюць, што яны з’яўляюцца прадстаўнікамі беларускай дэмакратычнай апазіцыі”, — сказаў Абрамавічус.

Чыноўнік таксама паведаміў, што прашэнні беларусаў на прытулак правяраюцца больш старанна праз пагрозу інфільтрацыі агентаў КДБ.

“Метады працы рэжыму могуць быць рознымі — гэта могуць быць людзі, укаранёныя з самага пачатку. Можа быць, рэжым выявіў нейкія слабыя месцы, звязаныя з блізкімі, сваякамі, маёмасцю”, — адзначыў ён.

У студзені 2023 года Абрамавічус заявіў, што МУС ужо прыняло мноства мер, каб спыніць перамяшчэнне патэнцыйна небяспечных людзей з Беларусі.

“Большая частка захадаў ужо прынятая, і ацэнка тых, хто прыбывае ў Літву, сапраўды стала больш жорсткай, выдаецца меншая колькасць дазволаў на часовае пражыванне. Пры выдачы гэтых дакументаў у абавязковым парадку прадстаўляюцца дадатковыя анкеты для ацэнкі патэнцыйнай пагрозы асоб нацыянальнай бяспецы. Усе гэтыя меры эфектыўныя”, — сказаў Абрамавічус.

У снежні 2023 года кіраўнік Дэпартамента дзяржбяспекі Літвы Дарус Яўнішкіс сцвярджаў, што беларусы, якія пражываюць у Літве, і ездзяць у Беларусь, уяўляюць цікавасць для беларускіх спецслужбаў.

“Вядома, у іх там (у Беларусі. — “Позірк”.) ёсць сваякі і пэўныя інтарэсы, тым больш у іх ёсць беларускія пашпарты. Але гэта, без сумневу, стварае беларускім спецслужбам пэўныя магчымасці для вярбоўкі, для аказання ўплыву, збору інфармацыі аб працэсах у Літве”, — сказаў Яўнішкіс.

Сёлета літоўскі Сейм прапаноўваў пазбаўляць беларусаў віду на жыхарства за частыя паездкі на радзіму, але гэтыя папраўкі ў законапраект не былі падтрыманыя падчас некалькіх слуханняў.