13 жніўня, Позірк. За апошнія два тыдні на волю выйшла не менш за 12 палітвязняў, паведамляе праваабарончы тэлеграм-канал MAYDAY.TEAM.
Праваабаронцы не выключаюць, што вызваленне адбылося ў рамках “другой хвалі амністыі”.
Сцвярджаецца, што сярод тых, хто выйшаў на волю, ёсць чалавек, якому заставалася “больш за два гады да заканчэння тэрміну”.
Паводле інфармацыі MAYDAY.TEAM, у некаторых папраўчых установах палітвязням, якія раней падалі прашэнні аб памілаванні, прапануюць напісаць іх “паўторна”.
Як паведамлялася 12 жніўня, прапагандыст Юрый Васкрасенскі тэлефануе сваякам палітвязняў, каб “прымусіць пісаць прашэнні аб памілаванні” на імя Аляксандра Лукашэнкі.
Паводле звестак праваабарончага цэнтра “Вясна”, палітвязняў агітуюць прасіць аб памілаванні “ў месцах пазбаўлення волі па ўсёй краіне”.
У ліпені “Вясна” паведамляла, што прадстаўнікі пракуратуры Мінска штодня прыязджалі ў наваполацкую калонію № 1 (Віцебская вобласць) і прымушалі палітвязняў пісаць хадайніцтвы аб памілаванні.
Раней пра “масавы збор прашэнняў аб памілаванні ад палітвязняў у калоніях, турмах і папраўчых установах адкрытага тыпу” паведамляла праваабарончая ініцыятыва Dissidentby.
У пачатку ліпеня праваабаронцы паведамлялі аб вызваленні 18 палітвязняў, якое адбылося пасля заявы Аляксандра Лукашэнкі. Адразу ж стала вядома, што адзін з іх — прыгавораны да 10 гадоў пазбаўлення волі старшыня Партыі БНФ Рыгор Кастусёў, імёны астатніх не называліся. Пасля з’явілася інфармацыя аб выхадзе на волю Дар’і Лосік, Тамары Астрэйка, Святланы Лупач, Кацярыны Мадзянковай і Паліны Палавінка. Усе жанчыны ўтрымліваліся ў папраўчай калоніі № 4 у Гомелі. У персанальных картах на сайце праваабарончага цэнтра “Вясна” адзначана, што яны вызваленыя па амністыі або памілаванні.
Старшыня Вярхоўнага суда Валянцін Сукала паведаміў, што пасля заявы Лукашэнкі было вызвалена 14 чалавек.
