У адзіны дзень галасавання дэмсілы правядуць у “Ютубе” марафон “Выбіраю новую Беларусь!” (дапоўнена)

20 лютага, Позірк. У адзіны дзень галасавання 25 лютага дэмакратычныя сілы правядуць у “Ютубе” марафон (працяглы прамы эфір) “Выбіраю новую Беларусь!”, паведаміла прэс-служба Святланы Ціханоўскай.

“У дзень “бязвыбараў” зрабі правільны выбар: застанься дома. Нам прапануюць зрабіць выгляд, што мы выбіраем. Але гэта падман. Будзе сітуацыя, калі наш удзел прывядзе да пераменаў. А сёння не ўдзельнічай у падмане — паглядзі ў “Ютубе” марафон”, — гаворыцца ў паведамленні.

Анансуецца ўдзел у анлайн-марафоне “больш за 20 спікераў” — “артыстаў і актывістаў, эканамістаў і палітыкаў, блогераў і журналістаў”, якія “падзеляцца сваім бачаннем, як ад дыктатуры падману і страху перайсці да новай Беларусі”.

Сярод удзельнікаў — Павел Латушка, Валерый Кавалеўскі, Аліна Коўшык, Аляксандр Дабравольскі, Анатоль Лябедзька, Павел Лібер, Вольга Зазулінская, Андрэй Стрыжак, Дзмітрый Лукашук, Міхаіл Рубін, Арцём Лядоўскі, Андрэй Павук, Аляксандр Кныровіч, Аляксандр Кабанаў, Сяргей Пятрухін, Яраслаў Раманчук, Іван Падрэз, Арцём Шапораў, Аляксандр Памідораў, Андрэй Курэйчык і інш.

Спікеры “адкажуць на пытанні, як прыйсці да дэмакратыі без катастроф і ўзрушэнняў, пабудаваць нармальную Беларусь, але не страціць краіну і кіравальнасць у ёй, падымуць пытанне перазапуску эканомікі і раскажуць, навошта беларусам пашпарт новай Беларусі” і інш.

Таксама дэмсілы заклікалі далучыцца да кампаніі “Бязвыбары”. Арганізатары прапануюць беларусам выкарыстоўваць гэтае слова замест слова “выбары” ў сацсетках, генераваць унікальны кантэнт для сваёй аўдыторыі з інфармацыяй пра тое, што маючыя адбыцца выбары не з’яўляюцца легітымнымі.

Падкрэсліваецца, што беларусам, якія плануюць глядзець марафон з Беларусі, варта выконваць меры лічбавай бяспекі: выкарыстоўваць VPN і не пісаць у чаце трансляцыі з акаўнтаў “Ютуба”, якія ўтрымліваюць рэальныя асабістыя дадзеныя (прозвішча, Імя, фота, відэа на канале).

Сёлета ўпершыню ў Беларусі пройдуць аб’яднаныя выбары — адзіны дзень галасавання прызначаны на 25 лютага. Назіраць за выбарамі запрошаныя прадстаўнікі СНД, Парламенцкай асамблеі АДКБ. Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе (БДІПЧ АБСЕ) запрашэння не атрымала.

Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі.

У якасці кандыдатаў у дэпутаты зарэгістраваныя толькі прыхільнікі Аляксандра Лукашэнкі. 20 лютага пачалося датэрміновае галасаванне.