23 студзеня, Позірк. Не менш за 84 чалавекі зазналі палітычны пераслед 23 студзеня ў рамках масавых ператрусаў і затрыманняў, паведаміў праваабарончы цэнтр “Вясна”.
Паводле інфармацыі праваабаронцаў, “частку з іх затрымалі, у некаторых проста правялі ператрус і адпусцілі”.
Адзначаецца, што пры вызваленні сілавікі ўручаюць “падпіскі аб неразгалошванні”.
“У пастановах супрацоўнікаў КДБ фігуруюць артыкулы за “фінансаванне экстрэмісцкай дзейнасці” і “ўдзел у экстрэмісцкіх фарміраваннях”, — удакладняецца ў паведамленні.
Дакладная колькасць затрыманых не называецца.
Частка затрыманняў, паводле папярэдняй інфармацыі, звязаная з арганізацыяй INeedHelpBY — ініцыятывай па аказанні харчовай дапамогі рэпрэсаваным. 23 студзеня КДБ прызнаў яе “экстрэмісцкім фарміраваннем”.
“Позірку“ вядома мінімум пра сем затрыманняў: у Віцебскай вобласці затрымана не менш за пяць чалавек — тры ў Наваполацку, два ў Полацку, яшчэ два — у іншых рэгіёнах.
Раней паведамлялася, што з ператрусамі супрацоўнікі КДБ прыходзілі да сваякоў палітвязняў і былых палітвязняў.
Затрыманая жонка палітвязня Мікалая Статкевіча. У Гомелі затрымалі экс-палітвязня, інваліда трэцяй групы з анкалагічным захворваннем Аляксея Раманава.
У маці удзельніцы праваабарончай ініцыятывы Dissidentby Марыны Касінеравай, якая знаходзіцца за мяжой, ператрус праходзіў з 8 да 18 гадзін. Пра гэта яна паведаміла ў “Фэйсбуку”.
Гл. таксама:
У Беларусі хваля затрыманняў сваякоў палітвязняў (дапоўнена)
СМІ: Затрыманая Марына Адамовіч — жонка палітвязня Статкевіча (дапоўнена)
Ціханоўская: Сёння ніхто ў Беларусі не можа адчуваць сябе ў бяспецы
