Лукашэнка запатрабаваў устанавіць “дакладную і зразумелую сістэму” цэнаўтварэння з 1 студзеня 2024 года

21 снежня, Позірк. З 1 студзеня 2024 года ў Беларусі “павінна быць дакладная і зразумелая сістэма” цэнаўтварэння, запатрабаваў Аляксандр Лукашэнка 21 снежня ў Мінску на нарадзе па пытаннях удасканалення сістэмы рэгулявання і кантролю за цэнамі.

“Мы мусім паглядзець, як гэты працэс развіваецца. Мэта адна — ніякія вытворцы, бізнесмены і іншыя не павінны бегаць у МАРГ або ўрад і ўзгадняць цэны”, — цытуе Лукашэнку яго прэс-служба.

Паводле яго слоў, рэгуляванне ў цэнаўтварэнні з’яўляецца “пытаннем справядлівасці”. “Адступленні ні налева, ні направа ад гэтай праблемы не будзе. Гэта пытанне маральнае, палітычнае, стратэгічнае. Як хочаце называйце. Але галоўнае — гэта пытанне справядлівасці”, — заявіў ён.

Па выніках нарады аб цэнавай сітуацыі ў краіне Лукашэнка 6 кастрычніка 2022 года падпісаў дырэктыву № 10 “Аб недапушчальнасці росту цэн”. Свае дакументы прынялі ўрад, Камітэт дзяржкантролю, Генпракуратура. Тыя, хто павысіць цэны без санкцыі міністра антыманапольнага рэгулявання і гандлю або старшыні аблвыканкама (Мінгарвыканкама), будуць несці адказнасць аж да крымінальнай, заявіў на нарадзе Лукашэнка.

10 кастрычніка ён скарэктаваў сваю пазіцыю: “Галоўнае — не забарона на рост цэн. Не забарона. Чытайце дырэктыву. Галоўнае — гэта выпрацоўка сістэмы кантролю за цэнаўтварэннем. А да выпрацоўкі гэтай сістэмы (гэта ўсяго толькі некалькі дзён), так, цэны расці не павінны”.

За павышэнне цэн узбуджаны шэраг крымінальных спраў.

Пра скасаванне дзеяння дырэктывы № 10 не паведамлялася.