Ці айцішнікам таксама можна, бо ў іх інтэрнэт? Туман вакол новага падатку
Падатак на прафдаход дазволілі ўжываць тым, хто працуе «з выкарыстаннем сеткі Інтэрнэт». Ці значыць гэта, што айцішнікам усё ж такі можна ў ППД? Пэўна. Але ўсё роўна да канца не зразумела.
Ад 1 студзеня ў Беларусі можна працаваць з выплатай падатку на прафесійны даход (ППД).
Пералік відаў дзейнасці, для якіх можна ўжываць ППД, прапісаны ў 851-й пастанове Саўміна. Да ІТ у гэтым пераліку можна аднесці толькі адзін пункт 4.12: «распрацоўка вэб-сайтаў, усталяванне (наладжванне) камп’ютараў і праграмнага забеспячэння, аднаўленне камп’ютараў пасля збою, рамонт, тэхнічнае абслугоўванне камп’ютараў і перыферыйнага абсталявання, навучанне працы на персанальным камп’ютары».
Аднак у апублікаваным сёння законе «Аб змяненні законаў у пытаннях падаткаабкладання» ёсць артыкул, які істотна пашырае гэты закрыты пералік.
«Артыкул 7. Ад 1 студзеня 2023 г. фізічныя асобы маюць права прымяняць падатак на прафесійны даход у парадку, вызначаным раздзелам 40 Падатковага кодэкса Рэспублікі Беларусь, у дачыненні да дзейнасці па выкананні работ (аказанні паслуг) на заказы іншых фізічных асоб, у тым ліку зарэгістраваных у якасці індывідуальных прадпрымальнікаў і (або) арганізацый па-за месцам знаходжання заказчыка (яго філіяла, іншага адасобленага структурнага падраздзялення), тэрыторыі або аб’екта, якія знаходзяцца пад кантролем заказчыка, з выкарыстаннем для выканання такіх работ (аказання такіх паслуг) і перадачы вынікаў выкананых работ (аказаных паслуг) сеткі Інтэрнэт.
Працяг гэтага ж артыкула
Дзейнасць фізічных асоб, якая ажыццяўляецца з прымяненнем падатку на прафесійны даход у парадку, вызначаным раздзелам 40 Падатковага кодэкса Рэспублікі Беларусь, не адносіцца да прадпрымальніцкай дзейнасці.
Угоды, разлікі ў якіх выконваюцца з выкарыстаннем прадугледжанай падатковым заканадаўствам праграмы «Падатак на прафесійны даход», могуць здзяйсняцца без заключэння грамадска-прававых дамоў у пісьмовай форме».
Прасцей кажучы, калі ты працуеш на заказчыка аддалена і выкарыстоўваеш пры гэтым інтэрнэт, то можаш плаціць ППД.
Аднак не ўсё так проста. Гаворка пра гэта вялася на пераднавагодняй прэс-канферэнцыі намесніка міністра па падатках і зборах Ігара Скрыннікава. Рэкамендуем праглядзець запіс, каб скласці сваё меркаванне пра задуму МПЗ і яе выкананне.
Намеснік міністра казаў пра «хітрыкі», на якія ведамства пайшло дзеля «фрылансу»:
— [Фрыланс] — гэта катэгорыя, якая не мае вызначэння. Гэта людзі, якія ажыццяўляюць нейкую дыстанцыйную працу, але заканадаўча тэрміна не вызначана. Мы вырашылі ў падатковым заканадаўстве вызначыць гэтую катэгорыю. Мы не называем яе фрылансам, гэта катэгорыя грамадзян, фізічных асоб, якая будзе мець права прымяняць падатак на прафесійны даход. Асноўны пасыл у тым, што свайго заказчыка (у дачыненні да работ, паслуг) дадзены грамадзянін/фізасоба/плацельшчык ППД мае знайсці праз інтэрнэт; выкананне работ мусіць ажыццяўляцца дыстанцыйна, па-за месцам знаходжання заказчыка; вынік мусіць перадавацца дыстанцыйна з дапамогай сеткі Інтэрнэт.
А вынікі якіх паслуг цяпер перадаюцца не праз інтэрнэт? Гэтае пытанне напрошвалася сам сабой, таму намеснік міністра апярэдзіў яго. Маўляў, людзі пытаюцца, ці не падпадаюць пад гэтую фармулёўку таксама бухгалтарскія, юрыдычныя і да т. п. паслугі (намеснік міністра назваў іх «прафесійнымі відамі паслуг»), ці можна і тут прымяняць ППД?
— Мы пакуль не спяшаемся каментаваць гэтае пытанне, — сказаў Ігар Скрыннікаў, — бо яно патрабуе ўзгаднення з іншымі зацікаўленымі на прадмет рэгулявання гэтай дзейнасці іншымі актамі заканадаўства.
Гэтае пытанне МПЗ абяцае пракаментаваць найбліжэйшым часам.
Далей, адказваючы на пытанні, намеснік міністра падкрэсліваў, што «ўсё, што звязана са сферай ІТ, патрапіць пад фрыланс». У кантэксце гэта можна трактаваць як меседж: айцішнікі, вы ўсе можаце ўжываць ППД. Што праўда, фармальна пытанні, на якія адказваў намеснік міністра, тычыліся тых паслуг, што падпадаюць пад п. 4.12 у пераліку Саўміна: распрацоўкі вэб-сайтаў і наладжвання 1С.
— Тое, што звязана са сферай ІТ, максімальна патрапіць у вызначэнне фрыланс, — сказаў Скрыннікаў. — Яны абсалютна спакойна змогуць працаваць з замежнымі юрыдычнымі асобамі, стаўка падатку — 10%, абмежаванняў на даход (60 тыс. BYN) няма, тут нашая фізасоба мае права рэгістравацца і пазначаць даходы. Дзяржава стварыла ўмовы ў выглядзе мабільнай праграмы. Далей мяч на баку нашых плацельшчыкаў ППД.
Спадарства, у поўным аб’ёме дэкларуйце даходы — падатак вам палічыцца аўтаматычна, вам нічога больш рабіць не трэба — плаціце падатак.
Дарэчы, праз два дні пасля гэтай прэс-канферэнцыі на сайце МПЗ з’явіўся ліст Ігара Скрыннікава, у якім згаданы арт. 7, але не тлумачыцца, што ён значыць.
З ліста:
«Улічваючы выкладзенае, фізічная асоба мае права ўжыць падатак на прафесійны даход, калі адначасова выконваюцца наступныя ўмовы:
дзейнасць фізічнай асобы ўключаная ў пералік АБО ў артыкул 7 праекта;
фізічная асоба самастойна ажыццяўляе дзейнасць і не прыцягвае да гэтай дзейнасці іншых фізічных асоб;
у дачыненні да дзейнасці, што ажыццяўляецца, у фізічнай асобы адсутнічае наймальнік».
У прыкладах (дадатак да ліста, які тлумачыць, хто — ППД, а хто не) пра айцішнікаў чамусьці нічога няма. Затое ёсць прыклад з інжынерамі — яны дакладна не ППД. А калі гэта ІТ-інжынеры і ў іх ёсць інтэрнэт? Чакаем тлумачэнняў да тлумачэнняў.
Што думаюць пра гэта падатковыя кансультанты? І чаму артыкул пра «паслугі праз інтэрнэт» так доўга не каментавалі?
— Гэты артыкул быў у праекце, — сказаў dev.by адзін з кансультантаў. — Нам паабяцалі ўдакладненне наконт таго, што такое фрыланс, але выразнага вызначэння мы пакуль не бачылі. Да фрылансераў можна аднесці ўсіх, хто працуе за камп’ютарам. Думаю, цяпер пачнуцца ўдакладненні: а ці можна па ППД працаваць бухгалтарам, а юрыстам, а весці анлайн-кансультацыі псіхолагам? Хутчэй за ўсё не, але няхай я памылюся.
Wanted. Калі вы айцішнік і звярталіся ў падатковую па тлумачэнні наконт ППД, напішыце нам у @devby_insight_bot пра свой досвед.
Читать на dev.by